Памёр былы начальнік упраўленняў КДБ у Гомельскай і Гродзенскай абласцях. Яму было 62 гады

26 лiстапада 2024 у 1732634280
Максім Іскрын / «Зеркало»

Памёр генерал-маёр Іван Корж, які раней быў кіраўніком упраўленняў КДБ у Гомельскай і Гродзенскай абласцях. Яму было 62 гады, паведаміла дзяржгазета «Гомельская праўда».

Іван Корж нарадзіўся ў вёсцы Навасёлкі Петрыкаўскага раёна. З адзнакай скончыў Беларускі інстытут інжынераў чыгуначнага транспарту. Пасля заканчэння ВНУ працаваў дзяжурным па станцыі, манеўравым дыспетчарам, намеснікам начальніка станцыі Віцебск БЧ.

У 1986 годзе Каржа прызвалі на вайсковую службу ў КДБ БССР. У пачатку 1990-х гадоў ён скончыў контрразведчыцкі факультэт Вышэйшай школы Міністэрства бяспекі Расійскай Федэрацыі і пачаў будаваць кар'еру ў органах дзяржбяспекі Беларусі.

З 2005 да 2010 года Корж быў начальнікам упраўлення КДБ па Гомельскай вобласці, а потым да 2014 года кіраваў упраўленнем КДБ на Гродзеншчыне. З 2014 да 2016 года працаваў начальнікам Інстытута нацыянальнай бяспекі Беларусі.

11 верасня 2016 года быў абраны дэпутатам Палаты прадстаўнікоў. Пасля прэзідэнцкіх выбараў 2010 года Каржа ўключылі ў спіс беларускіх чыноўнікаў, якім забаронены ўезд у ЕС. Увядзенне абмежаванняў патлумачылі тым, што на пасадзе кіраўніка КДБ па Гарадзенскай вобласці ён быў адказны за рэпрэсіі КДБ супраць грамадзянскай супольнасці і дэмакратычнай апазіцыі ў рэгіёне.