Мінскае «Дынама» проста цяпер не трапляе ў плэй-оф КХЛ. 3 студзеня каманда абыграла хабараўскі «Амур», але да гэтага было восем паразаў запар. Адставанне ад прахаднога восьмага месца складае ўсяго адно ачко (праўда, у «Северсталі», якая ідзе перад «Дынама», дзве гульні ў запасе), аднак, відавочна, «зубры» правальваюць сезон. За спінай ужо дзве траціны рэгулярнага чэмпіянату, а галоўнага трэнера Крэйга Вудкрафта не звальняюць. Спрабуем знайсці прычыны, чаму ў канадца дагэтуль свята вераць у Беларусі.
Няма годнай замены
— Нашая задача — выхад у плэй-оф, а таксама праход далей па сетцы. Напэўна, такія мэты нават не ставяцца, а мы сумесна з трэнерскім штабам, кіраўніцтвам, назіральнай радай ставім сабе гэтыя задачы, таму што банальны выхад у плэй-оф не будзе для нас дасягненнем. Мы не толькі хочам выйсці ў плэй-оф, але і пашумець там, — гаварыў перад стартам цяперашняга сезона гендырэктар клуба Сяргей Сушко.
Канкурэнцыя ў Заходняй канферэнцыі КХЛ, дзе выступае «Дынама», нізкая. Пасля пачатку вайны ва Украіне адмовіўся гуляць у лізе фінскі «Ёкерыт». Потым адклікала заяўку з чэмпіянату рыжскае «Дынама». Цяпер на «захадзе» ўсяго 11 клубаў. Але мінскае «Дынама» апярэджвае толькі «Сочы» (абсалютны аўтсайдар КХЛ) і кітайскі «Куньлунь», які базуецца ў Расіі і даўно камплектуецца нітка да ніткі.
Вудкрафт выводзіў «зуброў» у плэй-оф у трох сезонах з чатырох. Але сёння, відавочна, не спраўляецца. «Дынама» ліхаманіць увесь чэмпіянат. Хоць у камандзе па-ранейшаму поўна легіянераў — цэлых 15.
26 кастрычніка трэнерскі штаб каманды папоўніў вядомы ў мінулым гулец зборнай Беларусі Аляксандр Андрыеўскі. Імаверна, ён адзіны, хто мог бы проста цяпер змяніць Вудкрафта. У Андрыеўскага ўжо ёсць досвед «пажарніка», у тым ліку ў «Дынама». Але апошняга значнага выніку ён дамогся ў сезоне-2016/2017, калі вывеў «Адмірал» у плэй-оф. З тых часоў хваліцца не было чым.
Альтэрнатыва — беспрацоўныя расійскія спецыялісты. Або вяртанне Міхаіла Грабоўскага, які працаваў побач з Вудкрафтам два з лішнім гады, але ў лістападзе 2021 года стаў генменеджарам зборных Беларусі.
Нацыянальнасць
Да канадскага трэнера «Дынама» трапляла ў плэй-оф пад кіраўніцтвам чэха Марка Сікоры і славака Любаміра Покавіча. Каманда яшчэ ні разу не пераадолела першую стадыю накаўт-раўнда. Але сам факт паказальны: толькі замежныя спецыялісты выводзілі «зуброў» у другую частку сезона.
Пасля пачатку вайны ва Украіне ў беларускіх клубах амаль не засталося легіянераў з далёкага замежжа. Напрыклад, у мужчынскім баскетбольным «Мінску» сёння два амерыканцы, у жаночай камандзе — прадстаўніца Партугаліі. Гандбольны «Мяшкоў» з Брэста нядаўна падпісаў кантракт з кітайцам.
На такім фоне хакей застаецца «астраўком дабрабыту», імаверна, падтрымліваючы ілюзію, што прыезд у Мінск не нясе ніякай рэпутацыйнай рызыкі. У «Дынама», акрамя трэнера Вудкрафта, цяпер восем гульцоў-паўночнаамерыканцаў.
У верасні мінулага года МЗС Канады заклікала канадскіх хакеістаў пакінуць Расію і Беларусь альбо публічна растлумачыць, чаму яны вырашылі застацца. Ніхто з «Дынама» не з’ехаў, як не пачулі мы і якой-кольвек рэакцыі ад гульцоў або трэнера. Тое, што яны працягваюць выступаць у нашай краіне, — іміджавы плюс для ўладаў Беларусі.
Заробак
Вядома, легіянеры выходзяць на лёд у Мінску не за тры капейкі. У КХЛ не прынята публічна раскрываць заробкі, але замежнікі ў «Дынама» на асаблівым становішчы.
У мінулым сезоне, паводле інфармацыі «Спорт-Экспрэса», чатыры легіянеры «зуброў» трапілі ў топ-150 самых дарагіх хакеістаў КХЛ. З улікам таго, што ў клубе працягваюць рабіць стаўку на вялікую колькасць замежнікаў, якіх у асноўным разводзяць беларускай моладдзю, відавочна, што тэндэнцыя не змянілася. Днямі паведамлялася, што канадскі абаронца Марк Барберыа атрымае за сезон у «Дынама» больш за 400 тысяч даляраў.
Вудкрафту ж за магчымы датэрміновы разрыў кантракта відавочна належыць вялікая няўстойка. Так было ў швейцарскім «Сервеце», дзе Крэйг затрымаўся толькі на год з належных трох, а потым быў звольнены праз кепскія вынікі. Але атрымаў шчодрую кампенсацыю (паводле некаторых звестак, амаль два мільёны даляраў) і мог сабе дазволіць наступны год не працаваць у прынцыпе.
Анатоль Курылец, які ў свой час быў гендырэктарам «Дынама», папракаў канадскага трэнера за сквапнасць:
— Гордзі (Дуаер — экс-галоўны трэнер «Дынама», які змяніў Вудкрафта ў 2017 годзе. — Заўв. рэд.) ні разу за сезон не прыйшоў да мяне ў кабінет і не сказаў: «Анатоль, аплаці мне, калі ласка, падсвечнік. Два рублі. Я сабе ў трэнерскі пакой купіў». А Вудкрафт прыходзіў і прасіў.
Іншая гісторыя тых часоў ад работнікаў «Дынама»: Крэйг папрасіў клубнага супрацоўніка выклікаць сабе таксоўку. Але грошы так і не вярнуў.
Напэўна, добраахвотна адмаўляцца ад заробку, нават калі не спраўляецца, канадзец не будзе.
Сумяшчальніцтва
Адначасова з «Дынама» Вудкрафт узначальвае нацыянальную зборную Беларусі. Яна праз санкцыі ў сувязі з вайной ва Украіне прапусціць чэмпіянат свету ў 2023 годзе. Але працягвае праводзіць таварыскія матчы.
У снежні 2022-га беларусы здолелі абыграць Казахстан і Расію на Кубку Першага канала (склады каманд былі вельмі далёкія ад аптымальных). Перамогу на гэтым турніры ў Беларусі паспелі ахрысціць «гістарычнай»: ад старшыні Федэрацыі Аляксандра Багдановіча да сенатара Дзмітрыя Баскава, які дыскваліфікаваны Міжнароднай федэрацыяй хакея, але ўпарта працягвае каментаваць хакейныя падзеі.
— Асабліва радуе тое, што мы чарговы раз убачылі зборную, аб’яднаную адной мэтай, адным жаданнем — перамагаць, адной жарсцю — да хакея. І перамогі, здабытыя нашай маладой і амбітнай камандай на міжнародных турнірах у Маскве, толькі пацвярджаюць слушнасць абранай Федэрацыяй стратэгіі, — заявіў Баскаў.
Незразумела, вядома, калі быў папярэдні раз, бо два апошнія афіцыйныя турніры зборная праваліла. Спачатку за Міхаілам Захаравым фінішавала 15-й з 16 на чэмпіянаце свету — 2021 (ад прамога вылету выратавала толькі тое, што праз каранавірус ЧС у ніжэйшых дывізіёнах не праводзіўся), а потым ужо за Вудкрафтам не здолела адабрацца на Алімпіяду ў Пекіне.
Але такія словы сенатара ў любым выпадку мусяць быць прыемнымі канадцу. Развітвацца пасля «гістарычнай» перамогі з адным з «герояў» — рызыкоўна. Хоць гісторыя нашага хакея добра памятае прыклад шкоды сумяшчальніцтва. Глен Хэнлан, які тройчы выводзіў беларусаў у топ-8 на чэмпіянатах свету, у 2009 годзе быў звольнены з «Дынама». Пасля гэтага канадзец сам пакінуў і зборную.
Сімпатыі Лукашэнкі
І тут варта зноў вярнуцца да алімпійскай кваліфікацыі ў канцы лета 2021 года. Беларусы з Вудкрафтам сенсацыйна прайгралі палякам (0:1), а ў вырашальным матчы адбору саступілі славакам (1:2) і праляцелі міма АГ у Пекіне.
Але не менш за сам факт няўдачы беларускія хакеісты запомніліся віншаваннем з днём нараджэння Аляксандра Лукашэнкі ў жанры «пакаяльнага відэа», на якім засвяціўся і Вудкрафт.
А перад гэтым Лукашэнка павесіў канадскаму трэнеру на шыю медаль, выйграны ў рэспубліканскіх спаборніцтвах сярод аматараў хакея, і прыабняў — гэта было ў красавіку 2021-га.
— Прыемна пазнаёміцца, — толькі і сказаў Вудкрафт, калі Баскаў, які знаходзіўся побач, пераклаў трэнеру, што ў наступным годзе той, са словаў Лукашэнкі, мусіць здабыць такую ж узнагароду.
— Я бываў і працаваў у многіх краінах свету, але нідзе не бачыў, каб прэзідэнт краіны так быў уцягнуты ў спорт высокіх дасягненняў. Ён сам гуляе, абмяркоўвае ўсе падзеі, жыве спортам. Так што беларускім гульцам пашанцавала, што іх прэзідэнт таксама захоплены хакеем. Лукашэнка па-сапраўднаму хоча зрабіць беларускі хакей найлепшым, — казаў Вудкрафт у інтэрв'ю TUT.BY у кастрычніку 2016-га, калі толькі пачынаў працу ў Беларусі.
Наконт падзеяў у Беларусі пасля жніўня-2020 і вайны ва Украіне канадзец ні разу не выказваўся.
Чытайце таксама
