У амерыканскім Даласе памёр Пол Александэр. Ён пражыў у апараце «Жалезныя лёгкія» больш за 71 год і трапіў у Кнігу рэкордаў Гінеса як чалавек, які даўжэй за ўсіх жыве дзякуючы апарату штучнага дыхання. Пра гэта паведамляе Sky News.
Пол Александэр памёр 11 сакавіка ва ўзросце 78 гадоў.
У шэсць гадоў ён перахварэў на поліяміеліт і з таго часу быў паралізаваны ніжэй за шыю. Выжываць яму дапамагалі «Жалезныя лёгкія» — спецыяльны 600-кілаграмовы цыліндр, з якога тырчыць толькі галава пацыента.
Пол Александэр стаў рэкардсменам: ні адзін чалавек, акрамя яго, не пражыў больш за 70 гадоў з апаратам штучнага дыхання. Яшчэ ў дзяцінстве фізіятэрапеўт навучыў Пола «глынаць паветра», скіроўваючы яго ў трахею з дапамогай языка. Такі метад дазволіў яму пакідаць «Жалезныя лёгкія» на некалькі гадзін на дзень.
Пол скончыў школу, адвучыўся ва ўніверсітэце і стаў юрыстам. Ён прымаў кліентаў у інваліднай калясцы і ў пашытым на замову касцюме. Ён лётаў на самалёце, бачыў мора і гуляў у казіно. Аднойчы яму нават удалося наведаць стрыптыз-клуб.
У апошнія гады ён ужо не рызыкаваў выбірацца з «Жалезных лёгкіх».