У другой гульні 1/8 фіналу, якая адбылася 1 ліпеня, партугальцы аказаліся мацнейшымі за славенцаў — у серыі пенальці.
Славенцы выйшлі ў плэй-оф, ні разу не перамогшы на групавым этапе. Партугальцы занялі першае месца ў сваім квартэце, але змазалі канцоўку, саступіўшы грузінам. Натуральна, Крышціяну Раналду, які зноў быў у стартавым складзе, і яго партнёры лічыліся фаварытамі матча.
У першым тайме партугальцы пастаянна ціснулі на суперніка. Яны гулялі на добрых хуткасцях, шмат валодалі мячом і часам не давалі славенцам літаральна падняць галаву, каб паспрабаваць адсунуць гульню ад сваёй брамы. Хоць удараў амаль не было — толькі патэнцыйна галявыя сітуацыі.
На 34-й хвіліне Раналду атрымаў шанец адзначыцца са штрафнога з добрай пазіцыі, але стрэлу форварда не хапіла дакладнасці.
У другой палове сустрэчы партугальцы працягнулі шукаць дарогі да брамы апанента. Крышціяну зноў далі прабіць перспектыўны штрафны — галкіпер Ян Облак не завагаўся. Славенцы самааддана абараняліся. А на 62-й хвіліне былі блізкія да поспеху ў рэдкай контратацы: Беньямін Шэшка прабіў абарону, аднак удар не атрымаўся.
У канцы тайма каманды дзейнічалі ўсё асцярожней. Партугальцы нібы страцілі надзею пераадолець непрыяцельскія рэдуты. Раналду, праўда, аднойчы атрымаў выдатны пас на ход, але прабіў проста ў Облака.
Гульня перацякла ў дадатковы час. На 103-й хвіліне Дыёгу Жота зарабіў пенальці. Мяч зноў аддалі Раналду, і той не забіў! Облак адгадаў кірунак удару. Крышціяну не змог стрымаць слёз…
У другім экстра-тайме Шэшка мог пахаваць усе надзеі суперніка, але не выкарыстаў выхад сам-насам. А ў серыі 11-метровых узялі верх партугальцы, прычым Раналду гэтым разам быў дакладны. Славенцы не рэалізавалі ніводнай спробы!
У чвэрцьфінале партугальцы згуляюць з французамі, якія напярэдадні перамаглі бельгійцаў.
Футбол. Чэмпіянат Еўропы. 1/8 фіналу
1 ліпеня. Партугалія — Славенія — 0:0 (па пенальці — 3:0).
У астатніх матчах 1/8 фіналу згуляюць: 2 ліпеня. Румынія — Нідэрланды (19.00), Аўстрыя — Турцыя (22.00).
