Надвор’е працягвае шакаваць беларусаў. Пасля некалькіх дзён спякоты і нядаўняй буры 22 ліпеня некаторыя нечакана ўбачылі «снег». Кадры «заснежанай» трасы М5 разляцеліся па сацсетках. Як паведамляюць кіроўцы, гэта ўчастак дарогі недалёка ад Бабруйска. Падобныя відэа знялі таксама пад Ганцавічамі і ў Гомельскай вобласці.
«Трошкі прайшло дожджыку, градзіку, незразумела што. Вось такая вось траса. Проста ўсе ў шоку, як такое можа быць. Сантыметраў пяць, можа, больш, усадзіла», — расказаў аўтар аднаго з ролікаў, які апублікаваў тэлеграм-канал Nadvorie і мясцовыя паблікі ў сацсетках.
«Гэта снег?», «Снег выпаў ці што?», «Што там адбываецца?» — здзіўляюцца каментатары.
Мяркуючы з відэа, нешта падобнае адбываецца і ў аграгарадку Раздзяловічы пад Ганцавічамі.
І ў Гомельскай вобласці.Насамрэч выпаў град, а не снег, так што нічога незвычайнага ў гэтай з’яве няма. Град утвараецца ў цёплы час года (з вясны да ранняй восені) з кучава-дажджавых аблокаў і навальнічных хмараў (у самым версе), якія нясуць магутныя залевы.
Большасць навукоўцаў лічыць, што град утвараецца толькі адначасова з навальніцамі.
Дарэчы, Белгідрамет папярэджваў, што «сёння, 22 ліпеня, навальніцы, якія назіраюцца месцамі па ўсходзе рэспублікі, у перыяд з 12 гадзін 30 хвілін да 18 гадзін распаўсюдзяцца на большую частку Гомельскай і Магілёўскай абласцей і захаваюцца да канца дня».