Італьянскі сад канца XVI — пачатку XVII стагоддзя з’явіцца ў музеі «Замкавы комплекс „Мір“», яго цяпер аднаўляюць. Пра гэта паведамілі ў музеі, піша «Мінская праўда».
Рэстаўрацыя замка завяршылася ў 2010-м, а ў 2022-м музей за свае пазабюджэтныя сродкі аднавіў дамбу і адкрыў летнюю кавярню. Потым пачалі наступны этап — складанне праектна-каштарыснай дакументацыі па аднаўленні на тэрыторыі замкавага комплексу італьянскага саду канца XVI — пачатку XVII стагоддзя.
«Уся праца пачыналася з адпаведных даследаванняў. Цесна супрацоўнічалі з работнікамі Нацыянальнай акадэміі навук Беларусі і чальцамі Савета па культуры Міністэрства культуры Рэспублікі Беларусь, каб падрыхтаваць дакументы для правядзення работ. Праект, згодна з якім праводзяцца аднаўленчыя работы, выкананы УП „Мінскпраект“. Дазвол атрыманы сёлета. Фінансаванне работ — пазабюджэтныя музейныя сродкі і прыцягненне дзяржаўных інвестыцыйных фінансаў», — расказаў дырэктар замкавага комплексу Аляксандр Лойка.
Паводле гістарычных крыніц XVIII стагоддзя, сад складаўся з 25 квадратаў, там вырошчвалі пладовыя дрэвы, гародніну і зёлкі. Раней супрацоўнікі музея звярталіся да архітэктараў ландшафту з Італіі, што падрабязна расказалі, якія пароды раслін характэрныя для такіх садоў.
Адновяць парк у тым жа месцы, дзе ён знаходзіўся за часамі Радзівілаў. Там высадзяць дрэвы, аформяць клумбы, уладкуюць дарожкі. Ужо ідзе добраўпарадкаванне возера, дзе з’явіцца фантан. Адзначаецца, што падчас прагулкі паркам, напоўненым пахам дрэваў у квецені, кустоў і кветак, турысты змогуць атрымаць сапраўднае эстэтычнае задавальненне. Чакаецца, што італьянскі сад у замкавым комплексе адновяць у 2025 годзе.
Усе рэстаўрацыйныя работы кантралюе Міністэрства культуры Рэспублікі Беларусь.