Трохгадовая Ава — прадстаўніца рэдкай разнавіднасці бенгальскіх тыграў. Яна праславілася дзякуючы фатаграфіям, якія супрацоўнікі заапарка размясцілі ў сацсетках. Карыстальнікі адзначылі яе незвычайна мяккі залацісты мех і выразныя «рысы твару». Многія параўноўваюць тыгрыцу з героямі мультфільмаў, а хтосьці жартуе, што яна даглядае сябе як сапраўдная дзіва, піша «Хайтэк».
Ава належыць да рэдкай катэгорыі тыграў, вядомай як залаты тыгр. Яе незвычайная афарбоўка выкліканая праявай рэцэсіўнага гена, які сустракаецца ў вельмі абмежаванай колькасці асобін. Гэты ген праяўляецца толькі пры пэўных умовах: абое бацькоў тыгрыцы мусяць быць яго носьбітамі. Паводле даследчыкаў, у свеце налічваецца менш за сто тыграў з такой афарбоўкай.
Нарадзілася Ава ў 2021 годзе ў парку Chiang Mai Night Safari. Яе бацькі прыбылі з Чэхіі і Паўднёвай Афрыкі. Разам з сястрой Лунай яна вырасла ў зоне, спецыяльна абсталяванай для драпежнікаў, і хутка забрала ўвагу наведнікаў дзякуючы свайму прыязнаму і гулліваму характару.
З моманту публікацыі фатаграфій і відэа з Авай колькасць наведнікаў сафары-парку прыкметна вырасла. Людзі прыязджаюць спецыяльна, каб убачыць тыгрыцу з яе незвычайным мехам. Супрацоўнікі парку падкрэсліваюць, што Ава асабліва добра ладзіць з дзецьмі і з задавальненнем ўзаемадзейнічае з гасцямі.
Унікальнасць і харызма Авы нагадваюць пра важнасць захавання рэдкіх відаў. Гісторыя тыгрыцы натхняе людзей на тое, каб клапаціцца пра прыроду і падтрымліваць праграмы, скіраваныя на абарону жывёл у дзікай прыродзе і заапарках.