Дэпутаты прынялі ў другім чытанні праект паправак у закон аб знешняй працоўнай міграцыі. У ім прадугледжаная новая працэдура кантролю за няпоўнагадовымі беларусамі, што з’ехалі з Беларусі і працуюць у іншых краінах. Пра гэта паведаміла прэс-служба Палаты прадстаўнікоў Нацыянальнага сходу.
Падчас дапрацоўкі праекта закона з траўня гэтага года (калі законапраект прынялі ў першым чытанні) дэпутаты хочуць замацаваць новае палажэнне, якое рэгулюе асаблівасці працаўладкавання за межамі Беларусі няпоўнагадовых працоўных-эмігрантаў.
— У дачыненні да дадзенай катэгорыі грамадзян, якія знаходзяцца за межамі Рэспублікі Беларусь без бацькоў (іншых законных прадстаўнікоў), органы дыпламатычнай службы будуць ажыццяўляць кантроль за ўмовамі іх знаходжання ў дзяржаве працаўладкавання, а таксама абарону іх правоў, свабод і законных інтарэсаў, — гаворыцца ў паведамленні прэс-службы Палаты прадстаўнікоў.
Акрамя таго, народныя прадстаўнікі прапануюць дапоўніць закон паўнамоцтвамі Аляксандра Лукашэнкі што да вызначэння асаблівасцяў рэгулявання адносін у галіне знешняй працоўнай міграцыі.
Таксама ў дакуменце пашырылі спіс замежнікаў, на якіх не распаўсюджваецца сфера дзеяння новай версіі закона. Туды прапануюць уключыць ахвочых працаваць у Беларусі замежных творчых работнікаў і прадстаўнікоў сферы культуры, тэхнічных спецыялістаў, якіх запрасілі ў нашую краіну дзяржаўныя арганізацыі культуры для праектаў. Выключэнні прапануюць таксама для замежных прафесійных трэнераў, якія працуюць з прафесійнымі спартоўцамі.
Акрамя таго, за гэты ж час дэпутаты скарэктавалі некаторыя тэрміны, якія выкарыстоўваюцца ў законе, напрыклад «высокакваліфікаваны работнік», «дамова аб садзейнічанні ў працаўладкаванні», «дамова аб працаўладкаванні». Паводле задумы, змена паняткавага апарату мусіць стымуляваць высокакваліфікаваных замежных спецыялістаў прыязджаць працаваць у Беларусь.
Характэрна, што 31 траўня, калі ў Палаце прадстаўнікоў законапраект прынялі ў першым чытанні, кіраўнік МУС Беларусі Іван Кубракоў падзяліўся сваімі чаканнямі наконт таго, што колькасць працоўных мігрантаў з краін Балтыі будзе расці. Такія высновы чыноўнік рабіў на падставе патоку турыстаў, якія вясной прыязджалі ў Беларусь па бязвізе.
У 2021 годзе ў Беларусь прыбыло каля 14 тысяч працоўных мігрантаў з 80 краін. У асноўным гэта былі грамадзяне Украіны, Кітая, Узбекістана, Турцыі, Азербайджана, Літвы.