Суд вынес прысуды прадстаўнікам незалежных прафсаюзаў — палітвязням Генадзю Фядынічу, Васілю Берасневу і Вячаславу Арэшку, піша праваабарончы цэнтр «Вясна».
Паводле звестак праваабаронцаў, суддзя Алена Папкова прызнала прадстаўнікоў незалежных прафсаюзаў вінаватымі і асудзіла:
- Генадзя Фядыніча на 9 гадоў пазбаўлення волі ва ўмовах узмоцненага рэжыму;
- Васіля Бераснева на 9 гадоў пазбаўлення волі ва ўмовах узмоцненага рэжыму;
- Вячаслава Арэшку на 8 гадоў пазбаўлення волі ва ўмовах агульнага рэжыму.
Нагадаем, кіраўнік Беларускага прафсаюза работнікаў радыёэлектроннай прамысловасці (РЭП) Генадзь Фядыніч, а таксама актывісты Васіль Бераснеў і Вячаслаў Арэшка абвінавачваліся па некалькіх артыкулах Крымінальнага кодэкса. У тым ліку ім інкрымінаваліся стварэнне экстрэмісцкага фармавання і ўдзел у ім (ч.1 і 3 арт. 361−1), заклікі да санкцый (ч. 3 арт. 361), распальванне варожасці (ч. 3 арт. 130).
Прысуды ім мусілі вынесці 27 снежня, але паседжанне перанеслі на няпэўны тэрмін з прычыны «невядомых абставін».
Праваабаронцы прызналі іх палітвязнямі.