Днём 19 сакавіка ў Гродне былі чутныя выбухі і страляніна, з’яўлялася інфармацыя і пра затрыманні. Пазней КДБ паведаміў пра «ліквідацыю замежніка», які, паводле версіі сілавікоў, планаваў тэракт і аказаў супраціў «з выкарыстаннем аўтаматычнай зброі і шляхам падрыву баявых гранат». Вечарам нядзелі выданне «Наша Ніва» паведаміла пра павышаную цікавасць сілавікоў да дома старшыні Гродзенскага аблвыканкама Уладзіміра Караніка. Паводле іх інфармацыі, туды прыехала міліцыя і службы размініравання з сабакамі. Паспрабавалі даведацца падрабязнасці таго, што адбывалася ў Гродне ў нядзелю.
«Калі будзе такая неабходнасць, то ўсе падрабязнасці будуць апублікаваныя»
Перш за ўсё нашая журналістка патэлефанавала ў прыёмны пакой Уладзіміра Караніка як звычайная грамадзянка. Там нас запэўнілі, што з ім усё ў парадку, але падрабязнасцяў інцыдэнту не расказалі.
— Я не ў курсе [таго, што адбылося], але ўсё на месцы. Ніхто нічога пакуль не казаў, — адказала супрацоўніца прыёмнага пакоя.
— Проста ўчора казалі, што і міліцыя прыехала, і службы размініравання…
— Усё добра, усё на месцы, працуем, дзякуй за клопат.
— Але што гэта наогул было такое, не ведаеце?
— Шчыра вам кажу, не ведаю. Неяк у нас у прыёмным сёння ніхто гэта не абмяркоўваў.
Ва УУС Гродзенскага аблвыканкама гаварыць з нашай журналісткай, якая тэлефанавала як усхваляваная жыхарка горада, наогул адмовіліся.
— Падкажыце, калі ласка, учора была навіна пра тэракт, які планаваўся ў Гродне. Можа, вы зможаце расказаць, што гэта за тэрарыст, адкуль ён, ці былі ў яго памагатыя? І наогул бяспечна ў горадзе цяпер ці не?
— У горадзе заўсёды бяспечна, супрацоўнікі міліцыі заўсёды напагатове, працуюць. Акрамя гэтага, я вам нічога не падкажу, — адказаў супрацоўнік УУС.
— Ну вось як бяспечна, калі кажуць, што да дома Караніка прыязджалі службы размініравання. Там нешта падарваць хацелі?
— Можаце ў нашую прэс-службу звяртацца, удакладняць у іх.
— Дык, а як наогул магчыма, што вось такі тэракт планаваўся?
— Яшчэ раз кажу, калі ёсць нейкія пытанні, можаце звяртацца ў прэс-службу. Такой інфармацыі ў мяне няма, каб вам расказаць.
У прыёмным пакоі КДБ, куды мы таксама тэлефанавалі, каб высветліць тое, што адбываецца, размаўляць і ўдакладняць дэталі не захацелі. На просьбу растлумачыць, што адбываецца і чаму ў Гродне былі чутныя стрэлы, супрацоўнік ведамства адказаў наступнае:
— Калі будзе такая неабходнасць, то ўсе падрабязнасці будуць апублікаваныя. Калі такой неабходнасці не будзе — значыць, не будуць. У адпаведнасці з заканадаўствам Рэспублікі Беларусь. Усяго вам добрага, да пабачэння.
— Слухайце, але тут пасярод белага дня стрэлы…
— Усё ў адпаведнасці з заканадаўствам, усяго вам добрага. Што неабходна давесці да насельніцтва, усё даведзенае або будзе даведзенае.
— Ну вы хаця б у навінах растлумачыце, што адбываецца, нічога не зразумела ж.
— Усё ў рамках заканадаўства, каментары ва ўстаноўленым законам парадку. Да пабачэння, усяго добрага.
Што гаворыць BYPOL
Мы таксама звярнуліся па каментар з нагоды таго, што адбылося ў Гродне, да аб’яднання былых сілавікоў BYPOL. Прадстаўнік арганізацыі Аляксандр Азараў расказаў «Люстэрку», што падрабязнай інфармацыі пра тое, што адбылося, у іх няма.
— Распаўсюджваюцца фэйкавыя імёны, я ведаю, што некаторым СМІ дасылалі імя і прозвішча нібыта застрэленага беларуса. Мы правяралі, такіх людзей не існуе, — расказаў Азараў. Падрабязнасцяў імавернага інцыдэнту каля дома Уладзіміра Караніка ў BYPOL таксама няма, удакладніў ён. І выказаў здагадку, што гэта можа наогул аказацца «ўкідам».
Што вядома пра здарэнне ў Гродне
Інфармацыя пра стрэлы і выбухі ў Гродне 19 сакавіка з’явілася ў тэлеграм-канале «Мая краіна Беларусь». Паводле чытача канала, гэта адбывалася на вуліцах Курчатава і Урублеўскага (з паведамлення КДБ вынікае, што перастрэлка з замежнікам, які нібыта планаваў тэракт, здарылася па вуліцы Курчатава, 5). Мяркуючы з відэазапісу ў публікацыі (яна досыць кепскай якасці), некалькі сілавікоў вывелі з пад’езда чалавека і пасадзілі яго ў прыпаркаваны побач мікрааўтобус.
Пра затрыманні са словаў відавочцаў таксама пісаў тэлеграм-канал «Суды и задержания. Гродно и область». У каментары «Люстэрку» прадстаўнікі канала ўдакладнілі, што пацвердзіць інфармацыю пра затрыманні ім пакуль не ўдалося. Праваабаронцам «Вясны» таксама не вядома пра затрыманні ў Гродне.
Выданне MOST са спасылкай на жыхарку горада паведаміла, што на выездзе з Гродна 19 сакавіка вайскоўцы з аўтаматамі пачалі правяраць усе аўтамабілі.
— Учора было добрае надвор’е, і многія з’ехалі з горада на шашлыкі. Мы з сям’ёй таксама вырашылі час прабавіць за горадам і пасля абеду вярталіся. Былі здзіўленыя, калі на ўездзе ў Гродна з боку Сапоцкіна было тры блакпасты. Каля Аўгустоўскага канала адзін быў, і два на саміх выездах з горада. Стаялі вайскоўцы з аўтаматамі і біноклямі, якія спынялі ўсе аўтамабілі. Правяралі дакументы. Мы не разумелі, чаму такі дагляд. А калі прыехалі дадому, то даведаліся пра сітуацыю ў горадзе з нейкім «інагентам», — расказала парталу чытачка з Гродна.
Чытайце таксама
