У Брэсце застрэліўся салдат тэрміновай службы 38-й Брэсцкай асобнай гвардзейскай дэсантна-штурмавой брыгады. Надзвычайнае здарэнне адбылося ў сакавіку, калі 20-гадовы хлопец быў у нарадзе, расказалі «Люстэрку» крыніцы, знаёмыя з сітуацыяй.
— Ён пару гадоў таму выпусціўся са школы. Як мінімум паўгода ўжо адслужыў, дэмбель мусіў быць ці вясной, ці восенню, — расказаў наш суразмоўца. — Усё здарылася нядаўна, можа, у сярэдзіне сакавіка. Казалі, што быў стрэл у лоб. Усе здзіўленыя, што так здарылася, таму што асаблівых праблем дома ў хлопчыка не было на той момант. Так кажуць тыя, хто з ім камунікаваў. Калісьці ў яго быў балючы разрыў з дзяўчынай. Але гэта адбылося даўно, паступова яго адпусціла, ён усё перажыў і пайшоў далей.
Паводле суразмоўцы, пахаванне загінулага салдата прайшло ціха.
— Усё было шыта-крыта. Яго пахавалі так, што многія ў атачэнні і не ведалі. Пра тое, што ён застрэліўся, пачалі даведвацца пасля пахавання, таму, мабыць, у частцы пра гэта маўчаць. Але ў войску так быць не мусіць, што хлопцы страляюцца ў нарадзе.
Інфармацыю пра гібель салдата «Люстэрку» пацвердзілі яшчэ двое знаёмых маладога чалавека.
— Кажуць, дэталі здарэння хаваюцца. Я была шакаваная проста тым фактам, што ён памёр. Мы ў апошнія гады не размаўлялі, але раней ён здаваўся мне цалкам жыццярадасным чалавекам, хоць многае магло змяніцца, — кажа дзяўчына. —
Ён быў прыязным, ціхім і спакойным, неканфліктным, трохі дзіўным, але ў тым і была яго абаяльнасць. Не ведаю, як гэта апісаць, — ён проста быў нібыта не з гэтага свету. Хоць, як на мяне, гэта і рабіла яго ім: індывідуальным, пацешным і цікавым.
Паведамленняў пра падобныя інцыдэнты ў афіцыйных крыніцах Міністэрства абароны Беларусі не было.
Нагадаем, удзень 20 сакавіка ў аддзяленні памежнага кантролю «Высока-Літоўск» у Камянецкім раёне знайшлі цела яшчэ аднаго салдата тэрміновай службы. Дзяржпамежкамітэт паведаміў, што 19-гадовы салдат здзейсніў суіцыд. Блізкія сям'і памерлага расказалі «Люстэрку», што загінулы салдат — Роберт Цімафееў, у войску служыў кухарам. Яны не вераць у тое, што хлопец мог здзейсніць самагубства.
Чытайце таксама
