Аляксандр Лукашэнка сёння, 30 траўня, займаўся кадравымі пытаннямі, але не змог прайсці міма «бучы пасля цэнтралізаванага экзамену», перадае яго прэс-служба. На ягоную думку, чыноўнікі ад адукацыі «ўчынілі катавасію», таму ён запатрабаваў «звычайнай, зразумелай сістэмы».
«Цэлую бучу паднялі пасля адзінага цэнтралізаванага экзамену. Розуму не хапіла зрабіць проста і зразумела, каб падлічыць гэтыя балы. Яны пачалі нейкія статыстычныя лічбы выводзіць на камп’ютары. Каму гэта трэба? Па-мойму, мы паступалі: ведаеш — тройка, вельмі добра ведаеш — чацвёрка, вельмі-вельмі добра — выдатна. А тут нейкія балы на камп’ютары вылічвалі», — заявіў Лукашэнка.
Лукашэнка сказаў, што патрэбная «звычайная, зразумелая сістэма».
«Трэба рабіць звычайную, зразумелую сістэму. І на наступным тыдні трэба зноў да гэтага вярнуцца. Сем'і кантралююць паступленне сваіх дзяцей, і гэта натуральна. Але яны не разумеюць, чаго мы хочам ад гэтых дзяцей. І, самае галоўнае, пішуць мне, што цяперашні экзамен „паказаў сваю ідэнтычнасць“ з мінулымі двума гадамі, калі яны ў школе здавалі экзамены. Дык навошта мы гэтую катавасію тады ўчынілі?» — пацікавіўся ён.
Нагадаем, напярэдадні сталі вядомыя вынікі першага цэнтралізаванага экзамену (ЦЭ) па беларускай і рускай мовах, які адбыўся 14 траўня. «Моўны» ЦЭ пісалі больш чым 53 тысячы выпускнікоў школ. Максімальныя 100 балаў атрымалі 413 вучняў па беларускай мове і 482 чалавекі па рускай мове, што ў разы больш, чым раней. Шмат каму не зразумелая методыка падліку.
Абураныя адзінаццацікласнікі разам з бацькамі працягваюць абрываць тэлефоны Рэспубліканскага інстытута кантролю ведаў (РІКВ). А некаторыя, як пісаў нам чытач, нават прыязджалі да будынка і патрабавалі сустрэчы з дырэктарам. У акаўнце рэдакцыі незадаволенасць сітуацыяй выказвалі дзясяткі чалавек.
Адзнакі за ЦЭ па законе перагледзець нельга.