Сэксуальныя практыкі могуць скончыцца не толькі яркім аргазмам, але і пераломам пеніса ці перфарацыяй урэтры. Гучыць непрыемна, але як гэтага пазбегнуць і, у выпадку чаго, лячыць? «Люстэрка» задало гэтыя пытанні ўролагу, чальцу еўрапейскай, амерыканскай і ўкраінскай асацыяцыі ўролагаў Аляксандру Кардонаву.
Адна з самых частых траўмаў — разрыў вуздэчкі
Паводле Аляксандра Кардонава, траўмы палавых органаў, якія людзі могуць атрымаць падчас сэксу — з’ява нярэдкая.
— Агулам немагчыма прадказаць, калі, з кім і як такое можа здарыцца, — кажа доктар. — Але звычайна траўмуюцца падчас вельмі актыўных, гарачых кантактаў ці падчас групавога сэксу, дзе цяжэй кантраляваць працэс.
Зрэшты, запэўнівае суразмоўца, нават «класічны» сэкс у місіянерскай позе можа пайсці не па плане.
— Неабавязкова практыкаваць нешта асабліва экзатычнае з Камасутры, каб траўмавацца, — адзначае суразмоўца. — Гэта могуць быць цалкам звычайныя позы. Напрыклад, калі жанчына ляжыць на стале, а мужчына стаіць. Пры актыўных рухах падчас палавога акту можна стукнуцца пенісам у сядальную костку сваёй партнёркі і траўмаваць пеніс.
А часам, дадае Кардонаў, для нанясення траўмы не патрэбная нават партнёрка. Траўмавацца неакуратным рухам рэальна падчас мастурбацыі.
— Вядома, пры класічнай мастурбацыі рукой траўмаваць сябе вельмі складана, — кажа доктар. — А вось сэкс-цацкамі — можна. Залежыць ад таго, як менавіта іх выкарыстоўваюць.
Напрыклад, калі ўзяць недастаткова змазкі і актыўна выкарыстоўваць штучную вагіну, то можна парваць вуздэчку — гэта злучальная тканка, з дапамогай якой крайняя плоць мацуецца да галоўкі пеніса.
Зыходзячы з досведу Аляксандра, разрыў вуздэчкі — адна з самых частых траўмаў.
— Лягчэй за ўсё парваць вуздэчку падчас анальнага сэксу, калі адбываецца значнае нацяжэнне скуры на пенісе. Асабліва калі задні праход непадрыхтаваны ці мала змазкі, — кажа медык. — Гэта не вельмі небяспечная, але малапрыемная траўма. У вуздэчкі добрае кровазабяспечанне, таму нават пры найменшым надрыве пачне цячы кроў.
У такім выпадку важна хутка яе спыніць. Калі гэта невялікі надрыў, то доктар раіць заціснуць рану і пачакаць, пакуль кроў спыніцца. Ужо пасля гэтага можна ацаніць пашкоджанне і вырашыць, ці патрэбны прыём у медыцынскага спецыяліста. Калі крывацёк вялікі, то ехаць у прыёмны пакой трэба неадкладна. Папярэдне варта прыкласці нешта халоднае да пеніса і заціснуць рану.
— У выпадку моцнага надрыву ці поўнага адрыву вуздэчкі лячэнне толькі аператыўнае, — канстатуе доктар. — Ад такой траўмы абароненыя толькі мужчыны з абразаннем, калі вуздэчку падчас працэдуры выдалілі. Часам, калі абразанне праведзенае не вельмі якасна, яе пакідаюць — тады застаецца і шанец пашкодзіць яе.
Пасля пашкоджанне яечак можна нават страціць дзетародную функцыю
Не менш рэдкія траўмы яечак. Іх можна ўмоўна падзяліць на два тыпы: павярхоўныя (драпіны, надрывы скуры) і ўнутраныя. Першыя адносна бяскрыўдныя. А вось другая група траўмаў вельмі небяспечная. Аляксандр Кардонаў рэкамендуе не ставіцца да іх бесклапотна і раіць: калі адчулі боль у адным або абодвух яечках і перад гэтым з імі праводзілася нейкая маніпуляцыя — тэрмінова ехаць у бальніцу.
— Напрыклад, партнёрка можа моцна масажаваць гэты орган. Адбываецца перакручванне яечка па восі, што ўплывае на сасуды, — перасцерагае медык. — Гэта вельмі небяспечна. Каб аднавіць крывацёк, у вас ёсць усяго 4−6 гадзін. Калі мужчына вырашыць пацярпець боль і прапусціць гэты важны момант, то адбудзецца адміранне яечак.
Аляксандр дадае, што калі былі закранутыя абедзве тэстыкулы, то мужчына можа страціць дзетародную функцыю. Таксама ішэмію яечак (то-бок зніжэнне ў іх кровазабяспечання) можна выклікаць, выкарыстоўваючы розныя аксэсуары — жгуты і кліпсы.
— Яшчэ здараецца западанне яечка ў пахвінны канал, — працягвае суразмоўца. — Гэта не лічыцца траўмай, але боль выклікаць можа. У гэтым выпадку трэба легчы і паспрабаваць акуратна «выціснуць» яечка назад. Калі не атрымліваецца і боль застаецца, то варта звярнуцца па дапамогу медыкаў.
Пеніс можна і зламаць — гэта прыводзіць да «сімптому баклажана»
Пералом пеніса Аляксандр Кардонаў называе адной з самых непрыемных траўмаў, хаця і не самай частай. Хоць у пенісе няма касцявой тканкі, гэтую траўму прынята называць менавіта такім словам.
— Падчас пералому адбываецца разрыў бялковай абалонкі пеніса, дзе знаходзіцца вялікая колькасць пячорыстых целаў, якія наліваюцца крывёю, — тлумачыць доктар. — Адпаведна, гэта выклікае моцны ўнутраны крывацёк. Развіваецца так званы сімптом баклажана. Пеніс у такім выпадку сапраўды нагадвае гэтую гародніну — і колерам, і памерам.
Пасля пералому ўсё адбываецца вельмі хутка — напуханне пеніса і ўтварэнне гематомы пачнецца адразу ж. У гэтым выпадку трэба як мага хутчэй ехаць у бальніцу.
— Патрабуецца тэрміновая аперацыя, — кажа доктар. — Падчас яе ўшываюць бялковую частку пеніса і праводзяць яго дрэнаж (выдаленне вадкага змесціва. — Заўв. рэд.), каб сабраць згусткі крыві. Хірургі прыбіраюць гематому і спыняюць крывацёк. Нягледзячы на такое страшнае апісанне, у будучыні траўма асабліва не адаб’ецца на палавым жыцці. Магчымая невялікая дэфармацыя пеніса, але на эрэкцыю гэта ніяк уплываць не будзе.
Паводле доктара, атрымаць такі пералом даволі проста.
— Я ўжо казаў пра сэкс на стале, калі можна стукнуцца пенісам у костку. Гэта адзін варыянт. Яшчэ адна небяспечная поза — «догі-стайл», калі мужчына ззаду, а партнёрка стаіць на каленях і локцях. Таксама можна зламаць пеніс, калі жанчына зверху і пара выкарыстоўвае занадта шмат змазкі. Праз гэта пеніс можа непрыкметна выпасці з похвы, а партнёрка няўдала прысядзе на яго.
Траўмы пеніса здараюцца і падчас аральнага сэксу
Паводле лекара, у асноўным гаворка ідзе пра драпіны, але трапляюцца і ўкусы.
— У аднаго майго пацыента жонка ад злосці ўкусіла яго падчас аральнага сэксу, — успамінае суразмоўца. — Калі пашкоджаная галоўка пеніса, то будзе моцны крывацёк. З сур’ёзнымі ўкусамі варта звярнуцца да доктара. У найлепшым выпадку ён проста зашые тканку пеніса. Але часам пашкоджаны фрагмент скуры даводзіцца выдаляць — гэта прывядзе да дэфармацыі пеніса.
Выпадкі, калі палавы орган зусім адкусілі, Аляксандру Кардонаву не трапляліся. На яго думку, гэта ў прынцыпе вельмі складана зрабіць.
І гэта не ўсё! Вось што яшчэ можа быць небяспечным
Нашкодзіць самім сабе пацыенты, як правіла, змудраюцца нашмат часцей, чым гэта ўдаецца іх партнёркам.
— У мэтах самазадавальнення чаго толькі людзі не робяць са сваімі геніталіямі. Самыя частыя выпадкі звязаныя з рознымі насадкамі на пеніс ці кольцамі для эрэкцыі (надзяваюцца на аснову пеніса для затрымання крыві ў ім. — Заўв. рэд.), якія мужчыны потым не могуць зняць, — кажа доктар. — Тое самае здараецца з прадметамі, якія ўстаўляюцца ва ўрэтру для стымуляцыі.
Такія прадметы могуць затрымацца ў мочавыпускальным канале, і выцягнуць самастойна іх ужо немагчыма.
— Чаго толькі мы не даставалі з урэтры, — успамінае Аляксандр. — Кактэйльныя трубачкі, ручкі, градуснікі, нейкія металічныя шарыкі. У нас у клініцы нават ёсць своеасаблівы музей, дзе мы захоўваем такія рэчы. Паказваем іх пацыентам.
Паводле суразмоўцы, такія ж музеі ёсць у практолагаў і гінеколагаў. У апошніх калекцыя багацейшая.
— Самы часты прадмет, які дастаюць з жанчын, — каўпачок ад антыперспіранта, — кажа доктар. — Калегі расказвалі, што адна іх пацыентка так актыўна мастурбавала, што засунула ў вагіну вяроўку для бялізны. Яна была некалькі метраў!
Наступствам такіх эксперыментаў часам не могуць даць рады не тое што іх удзельнікі, але і медыкі.
— Аднойчы пацыент прыйшоў да мяне з металічнай гайкай на пенісе, — успамінае Аляксандр. — Прычым не звычайнай, а каванай, якую выкарыстоўваюць для мацавання на чыгуначных шляхах. Яна проста так не распільваецца нават балгаркай. Давялося выклікаць ратавальнікаў, каб зрабілі гэта спецыяльнымі інструментамі.
Небяспечныя такія практыкі не толькі праз захрасанне прадметаў. Яшчэ адзін пацыент нашага суразмоўцы давёў сябе такой стымуляцыяй да перфарацыі ўрэтры (то-бок пашкоджання яе сценак). У выніку ў яго пачаліся праблемы з мочавыпусканнем. Давялося рабіць некалькі аперацый, каб гэта выправіць.
Галоўная парада — не цярпіце
Нягледзячы на камічнасць апісаных сітуацый, Аляксандр Кардонаў яшчэ раз папярэджвае: большасць траўмаў геніталій вельмі небяспечная. І таму звяртацца па дапамогу да спецыялістаў трэба адразу.
— Людзі часта думаюць, што боль і дыскамфорт ад пашкоджання можна пацярпець. Або прыкласці капусны ліст, каб усё прайшло, — кажа доктар. — Калі праз дзень-два разумеюць, што так не працуе, то ўсё роўна прыходзяць. Вось толькі дапамагчы можа быць ужо цяжэй ці нават немагчыма.
Паводле назіранняў медыка, чым маладзейшы мужчына, тым хутчэй ён прыйдзе да доктара. Чым старэйшы, тым даўжэй будзе чакаць, што «пройдзе само». Яшчэ адна катэгорыя, якая можа цярпець — падлеткі, якія баяцца бацькоў. Таму вельмі важна прамаўляць з імі гэтыя моманты і тлумачыць, што ніякага сораму ў гэтым няма.
— Дарослых гэта таксама датычыць, — дадае доктар. — Паверце, вы медыкаў у прыёмных пакоях нічым не здзівіце. Яны ўжо бачылі ўсё. І смяяцца з вас ніхто не будзе. Затое яны ведаюць, што рабіць, каб выратаваць вашае здароўе.
Чытайце таксама
