У Жодзіне затрымалі некалькі экс-супрацоўнікаў мясцовага ГАУС, якія падчас пратэстаў у 2020 годзе запісалі зварот да калег і да ўсіх работнікаў органаў, паведамляе мясцовае выданне Ex-Press са спасылкай на ананімную крыніцу.
Адзначаецца, што затрыманні праводзіліся на мінулым тыдні. Заключаныя пад варту былыя афіцэры міліцыі, сярод якіх — падпалкоўнік міліцыі, былы намеснік начальніка аддзела ГУБАЗ МУС Рэспублікі Беларусь, які доўгі час займаў пасаду начальніка крымінальнай міліцыі Жодзінскага ГАУС, Ігар Кісляк.
Таксама сярод затрыманых — былы намеснік начальніка Жодзінскага ГАУС, начальнік міліцыі грамадскай бяспекі Вячаслаў Ільіч, былы намеснік начальніка Жодзінскага ГАУС па ідэалагічнай працы і кадравым забяспечанні Андрэй Дарошка, экс-кіраўнік следчага аддзела Віталь Папроцкі, а таксама начальнік следчага аддзялення Дзмітрый Удовін.
У сваім звароце ў 2020-м яны казалі пра недапушчальнасць гвалту ў дачыненні да мірных грамадзян Беларусі.
У верасні мінулага года ў Брэсце судзілі былога супрацоўніка міліцыі Кірыла Гняздзілава па справе пра злівы ў тэлеграм-канал «Чорная кніга Беларусі» (ЧКБ).
Пра крымінальную справу вядома няшмат — працэс праходзіў у закрытым рэжыме.
Паводле звестак праваабаронцаў, Кірыла Гняздзілава судзілі па артыкулах пра садзейнічанне распальванню варожасці і незаконныя дзеянні ў дачыненні да інфармацыі пра прыватнае жыццё. Яго прызналі вінаватым і адправілі на восем гадоў у калонію ўзмоцненага рэжыму. Яго таксама пазбавілі звання капітана і абавязалі выплаціць маральную кампенсацыю двум пацярпелым на агульную суму 3 тысячы рублёў.