Адным з асноўных патрабаванняў Беларускага саюза жанчын (БСЖ) падчас распрацоўкі абноўленай рэдакцыі Канстытуцыі было замацаванне ў ёй паняцця шлюбу як саюза паміж мужчынам і жанчынай, заявіла намесніца кіраўніцы БСЖ, першая намесніца старшыні Мінгарвыканкама Надзея Лазарэвіч 14 лютага падчас відэамоста «Партнёрства без межаў». А вось сяброўка праўлення Савета старэйшын БСЖ Іна Салдаценка лічыць, што «жанчына Беларусі, жанчына Расіі — яна ў тым ліку і мужчына», піша выданне «Позiрк».
Паводле Надзеі Лазарэвіч, «захаванне традыцыйных каштоўнасцяў вельмі важнае» для таго, каб Беларусь «развівалася, памнажалася». Яна заявіла, што сёлета да ўдзелу ў акцыі БСЖ «Беларусь памятае. Жаночы твар Перамогі» запрошаны В’етнам.
«У нейкі перыяд часу ў любой з краін, з якімі мы цяпер сябруем, усюды ёсць абавязкова той час, калі жанчыны станавіліся на шлях падтрымкі абароны тэрытарыяльнай сваёй краіны, як цяпер непасрэдна вось у гэтым працэсе знаходзіцца Расійская Федэрацыя, ды і мы, Рэспубліка Беларусь, вельмі актыўна падтрымліваем і заўсёды гаворым пра тое, што абарона, цэласнасць, абарона краіны — гэта вельмі важна і для нас, для жанчын, для маці», — сказала яна.
У сваю чаргу сяброўка праўлення Савета старэйшын БСЖ, дырэктарка РНПЦ анкалогіі і медыцынскай радыялогіі імя Аляксандрава Іна Салдаценка заявіла: «Жанчына Беларусі, жанчына Расіі — яна ў тым ліку і мужчына». «Так складваецца часам жыццё», — сказала яна, відаць, маючы на ўвазе, што беларускім і расійскім жанчынам даводзіцца выконваць у сям'і «мужчынскія функцыі» ў разуменні змагароў за «традыцыйныя каштоўнасці».
«Пра яе мусіць хтосьці паклапаціцца, і мы як прадстаўнікі суб’екта грамадзянскай супольнасці павінныя паклапаціцца пра гэтую частку нашай грамадзянскай супольнасці, а менавіта пра нашых мілых жанчын», — дадала прадстаўніца БСЖ.
Паводле Салдаценка, у Беларусі гэты клопат выяўляецца сярод іншага ў штогадовай акцыі «Здароўе жанчыны — здароўе нацыі». У межах акцыі праводзіцца ранняя дыягностыка анкалагічных захворванняў у калектывах прадпрыемстваў, дзе працуюць жанчыны.
Кіраўніца моладзевага крыла БСЖ Дзіяна Мішура расказала пра «Тыдзень бацькоўскай любові», які праходзіць у Беларусі і пачынаецца ў Дзень маці (14 кастрычніка), а заканчваецца Днём бацькі (21 кастрычніка).
«Цягам гэтага тыдня бацькоўскай любові мы робім вельмі шмат добрых справаў: тэлефануем мамам, татам, гаворым пра важнасць, пра сямейныя традыцыі. Моладзь ходзіць у аўдыторыі студэнцкія, школьныя, падымае важнасць тэмаў пра тое, што сапраўды сёння сям’я — гэта не проста слова, а гэта вельмі важнае слова, якое нясе ў сабе любоў, цеплыню. І што сёння саюз мужчыны і жанчыны — гэта сапраўды вельмі важна. І чаму не варта браць прыклады з заходніх краін і [варта] захаваць тое, што сёння ёсць у нашых краінах садружнай дзяржавы», — заявіла Мішура.
Беларускі саюз жанчын — праўладная арганізацыя, якая сярод іншага перадае гуманітарную дапамогу «Дабрачыннаму фонду Аляксея Талая» для «падтрымкі дзяцей Данбаса».
Відэамост ініцыявала Агульнарасійская грамадска-дзяржаўная арганізацыя «Саюз жанчын Расіі». Арганізатары анансавалі, што ўдзельніцы сярод іншага раскажуць пра выклікі, з якімі сутыкаюцца сучасныя жанчыны, але гэтая тэматыка не абмяркоўвалася.
Акрамя прадстаўніц Беларусі і Расіі ў мерапрыемстве ўдзельнічалі прадстаўнікі Абхазіі і Паўднёвай Асеціі — самаабвешчаных дзяржаваў на тэрыторыі Грузіі (з 193 сябраў ААН іх незалежнасць прызнаюць толькі 5 краін — Расія, Нікарагуа, Венесуэла, Науру і Сірыя). Мінск юрыдычна не лічыць гэтыя ўтварэнні дзяржавамі, але актыўна развівае эканамічныя адносіны.
