Прайшоў ужо год з таго часу, як сям’я беларускай палітзняволенай Марыі Калеснікавай апошні раз атрымала ад яе ліст. З таго часу ніхто яе не бачыў і нічога не чуў пра яе, паведамілі яе блізкія агенцтву Associated Press.
— Я магу толькі маліцца, каб мая дачка была жывая, бо адміністрацыя калоніі ў Гомелі не дазваляе спатканні і не адказвае на мае лісты і запыты, — расказаў праз тэлефон AP бацька Марыі Аляксандр Калеснікаў.
Ён дадаў, што Марыя Калеснікава больш за год знаходзіцца ў строгай ізаляцыі, не атрымлівае лістоў, а візіты адвакатаў да яе забароненыя.
— Яе сваякі вар’яцеюць і страцілі сон, — сказаў Аляксандр.
Міністр замежных справаў Германіі Аналена Бербак таксама выказала занепакоенасць адсутнасцю вестак ад палітзняволенай.
— Мы не ведаем, як там Марыя. Але мы ведаем, што яе барацьба за свабоду працягваецца, што яна не была марнай — бо яе працягваюць мужныя людзі, — заявіла Бербак.
Як адзначаюць праваабаронцы, апошні раз Калеснікава тэлефанавала родным у лістападзе 2022 года, а 5 снежня 2022 года яе бацька апошні раз бачыў яе ў медчастцы калоніі. Адвакат Марыі змог убачыць палітзняволеную 2 лютага 2023 года — больш яго да падабароннай не пускалі. Апошні ліст, які сваякі атрымалі ад Марыі, датаваны 12 лютага 2023 года.
Нагадаем, нядаўна скаргу на знікненне Калеснікавай разглядала рабочая група ААН па гвалтоўных ці недобраахвотных знікненнях.
Марыя Калеснікава была кіраўніцай выбарчага штаба Віктара Бабарыкі і ўваходзіла ў прэзідыум Каардынацыйнай рады. У верасні 2020 года яе разам з яшчэ двума сябрамі Каардынацыйнай рады прывезлі на беларуска-ўкраінскую мяжу. Але палітык парвала свой пашпарт і адмовілася з’язджаць з Беларусі.
Марыю абвінавачвалі па шэрагу артыкулаў: ч. 3 арт. 361 КК (Заклікі да дзеянняў, скіраваных на нанясенне шкоды нацыянальнай бяспецы Рэспублікі Беларусь), ч.1 арт. 357 КК (Змова з мэтай захопу ўлады неканстытуцыйным шляхам), арт. 361−1 КК (Стварэнне экстрэмісцкага фарміравання). У верасні 2021 года Калеснікаву асудзілі на 11 гадоў калоніі агульнага рэжыму, яна адбывае тэрмін у гомельскай жаночай папраўчай калоніі № 4. Палітзняволеную таксама ўнеслі ў «спіс асобаў, датычных да тэрарыстычнай дзейнасці».
