Пара пенсіянераў з Камянецкага раёна вырашыла ўзяць крэдыт, каб падключыцца да газазабяспечання. Яны знайшлі фірму, якая паабяцала даць ім сродкі ў кароткія тэрміны — 5000 рублёў. Але заключыўшы дамову, яны даведаліся, што грошы яны возьмуць у банка — і далёка не на выгадных умовах. Муж і жонка на наступны ж дзень выплацілі крэдыт банку, але праз паўгода фірма-пасярэднік выставіла ім рахунак за свае паслугі — 4000 рублёў. У справу ўмяшалася пракуратура, паведамляе пр’с-служба ведамства.
72-гадовы пенсіянер і яго жонка ў 2021 годзе вырашылі падключыцца да сеткі газазабяспечання. Для аплаты паслуг яны хацелі скарыстацца крэдытам — ім трэба было 5000 рублёў. У пошуках арганізацыі, якая магла б даць ім сродкі ў кароткія тэрміны, муж і жонка знайшлі рэкламу таварыства з абмежаванай адказнасцю. Для афармлення заяўкі яны прыехалі ў офіс арганізацыі ў Кобрыне, дзе пасля гутаркі з яе прадстаўніком мужчына падпісаў дамову.
Праз некалькі гадзін прадстаўнік арганізацыі праз тэлефон паведаміў ім, што крэдыт ухвалены. На рахунак пенсіянера паступілі грошы. Але, як выявілася, грошы былі не ад арганізацыі, а ад банка — і далёка не на такіх выгадных умовах, як абяцалі пары. Муж і жонка датэрмінова скасавалі дамову з банкам і вярнулі грошы.
«Пра гэта яны праз тэлефон паведамілі прадстаўніку арганізацыі — той запэўніў, што ніякіх даўгоў у іх няма. Але праз паўгода мужчыну на пошту паступіла патрабаванне аплаціць кошт кансультацыйных паслуг, аказаных арганізацыяй, а таксама пеню ў сувязі з нясвоечасовай аплатай на агульную суму больш за 4000 рублёў», — расказалі ў ведамстве.
У справу ўмяшалася пракуратура, а суд пастанавіў прызнаць дамову паміж пенсіянерам і арганізацыяй несапраўднай — бо мужчыну ўвялі ў зман. Суд таксама абавязаў фірму вярнуць 540 рублёў, якія мужчына ёй раней заплаціў.