МЗС Германіі пацвердзіла інфармацыю пра смяротны прысуд грамадзяніну ФРГ Рыка Крыгеру ў Беларусі, піша Deutsche Welle
Як паведамілі выданню ў МЗС Германіі, ведамства і амбасада ФРГ у Мінску аказваюць консульскую дапамогу мужчыну і інтэнсіўна працуюць з беларускімі ўладамі ў яго інтарэсах.
«Смяротнае пакаранне — гэта жорсткая і бесчалавечная форма пакарання, якую Германія адхіляе ў любых абставінах», — адзначылі ў дыпведамстве.
Нагадаем, днём 19 ліпеня з’явілася інфармацыя, што Мінскі абласны суд у канцы чэрвеня асудзіў на смяротнае пакаранне грамадзяніна Германіі Рыка Крыгера.
У профілі Рыка Крыгера ў прафесійнай сетцы LinkedIn апошнім месцам працы пазначаны Нямецкі Чырвоны Крыж. Там ён працаваў з 2021 года тэхнікам хуткай медыцынскай дапамогі. Да гэтага ён быў надомным медбратам. З 2014 да 2017 года, як адзначана ў яго LinkedIn, Рыка Крыгер быў ахоўнікам пры амбасадзе ЗША ў Берліне.
Як заявіў праваабарончы цэнтр «Вясна», справа вайсковага медыка Крыгера датычыць палка Каліноўскага (яго структурнага падраздзялення — замежнага механізаванага батальёна Western). У каментары «Люстэрку» прадстаўнікі палка сказалі, што Рыка ніякага дачынення да іх не мае.
