14 лістапада споўнілася 70 гадоў Юрыю Жадобіну-экс-міністру абароны Беларусі, экс-кіраўніку КДБ і экс-кіраўніку Службы бяспекі Аляксандра Лукашэнкі, паведамляе Міністэрства абароны.
З юбілеем былога міністра Юрыя Жадобіна павіншаваў цяперашні міністр Віктар Хрэнін.
«У выніку дальнабачных рашэнняў былі закладзеныя далейшыя асновы перспектыўнага развіцця беларускай арміі. Адначасова былі ўвасобленыя ў жыццё наватарскія рашэнні сацыяльных праблем вайскоўцаў і членаў іх сем’яў. Выбітнымі заслугамі адзначаная вашая дзейнасць на высокіх пасадах», — заявіў Хрэнін.
Хто такі Юрый Жадобін?
Юрый Жадобін — адзін з нямногіх чыноўнікаў, які пабываў на шматлікіх пасадах пры ўладзе Аляксандра Лукашэнкі.
Ураджэнец украінскага Днепрапятроўска (цяпер — Днепр) чатыры гады быў намеснікам міністра МУС — камандуючым унутранымі войскамі МУС Беларусі, потым узначальваў Службу бяспекі Лукашэнкі — з 2003 да 2007 года.
Са Службы бяспекі ў 2007 годзе ён перайшоў на пасаду кіраўніка КДБ. Праўда, пакіраваў структурай нядоўга (хоць і паспеў раскрыць шпіёнскую сетку ЗША ў Мінску) — і ўжо праз год стаў, як гэта часта бывае з былымі ахоўнікамі Лукашэнкі, дзяржсакратаром Савета бяспекі. Там Жадобін таксама не затрымаўся. У канцы 2009 года яго прызначылі кіраваць Міністэрствам абароны. Менавіта ў гэтай ролі Жадобін і запомніўся лепш за ўсё, бо абаронным ведамствам ён кіраваў амаль пяць гадоў, да лістапада 2014-га.
Адной з самых рэзанансных гісторый, якія паўплывалі на кар’еру Жадобіна, стаў эпізод з высадкай «дэсанту» плюшавых мішак на ўскраіне Мінска, скінутых з лёгкаматорнага самалёта грамадзянамі Швецыі 4 ліпеня 2012 года. Вынікам стала завядзенне крымінальнай справы, затрыманне журналіста Антона Сурапіна, які першым пра гэта расказаў, а таксама звальненні ў Мінабароны. Жадобін пасаду захаваў, аднак атрымаў папярэджанне пра няпоўную службовую адпаведнасць — разам з кіраўнікамі Савета бяспекі і КДБ.
За Жадобіным у войску абмяркоўваліся новаўвядзенні — у прыватнасці, альтэрнатыўная служба для прызыўнікоў, якія не могуць служыць ва Узброеных сілах праз рэлігійныя перакананні. Міністр быў катэгарычна супраць гэтага. «Я лічу гэта надуманым і непатрэбным. Няма ў менталітэце народа гэтага — адлыніць ад войска. Гэта дзеці вярхушкі „пятай калоны“ і тыя, якія выхаваныя невядома як, у пачуцці нянавісці да сваёй Радзімы, ці што. Вось яны лічаць Узброеныя сілы невядома чым. І вы думаеце, яны будуць дзесьці прыносіць карысць? Я думаю, гэта проста спосаб адлыніць ад службы», — заяўляў у 2013-м Жадобін. Альтэрнатыўную службу ў Беларусі ўсё ж увялі — у 2016-м.
У 2014-м Лукашэнка звольніў Жадобіна ў запас па ўзросце з правам нашэння вайсковай формы адзення і знакаў адрознення. Цікава, што санкцыі Еўрасаюза, якія накладзеныя на яго і традыцыйна адмяняюцца, калі чыноўнік пакідае сваю пасаду, для былога міністра пакінулі ў сіле.
