Муж першай намесніцы старшыні Мінгарвыканкама Надзеі Лазарэвіч арыштаваны і знаходзіцца ў СІЗА, сама яна таксама прайшла праз затрыманне, піша «Наша Ніва».
Мужа Надзеі Лазарэвіч завуць Алег Сахно. Ён на чатыры гады маладзейшы за жонку. Пара разам з 2007 года, выхоўвае дачку. Інфармацыю пра тое, што муж Лазарэвіч арыштаваны і знаходзіцца ў СІЗА, «Наша Ніва» спраўдзіла ў некалькіх яго былых калег.
Па якім артыкуле яго абвінавачваюць, невядома. Выданне мяркуе, што справа Алега Сахно можа быць звязаная з карупцыяй. У траўні 2023 ён быў прызначаны начальнікам буйнога дзяржаўнага холдынгу «Белфармпрам», які ўключае ў сябе восем фармацэўтычных прадпрыемстваў. Але на высокай пасадзе пратрымаўся ўсяго год. Ужо 12 чэрвеня 2024 года калектыву прадставілі новага генеральнага дырэктара Ігара Мітрафанава разам з намеснікам. А фота Сахно і яго намеснікаў з сайта зніклі. 19 чэрвеня 2024 года — апошні дзень, калі той быў анлайн.
«У гэтай гісторыі ёсць і яшчэ адзін нюанс. Паводле суразмоўцаў, гэтым летам кашмарылі і саму Надзею Лазарэвіч: дома праводзілі ператрус, а яе, як цяпер кажуць, „ненадоўга забіралі“. Колькі часу яна прабыла ў ізалятары, невядома, але вядома, што з працы яе не звольнілі, а значыць, абвінавачанне не выставілі. Тады лагічна будзе дапусціць, што Лазарэвіч, калі і праўда правяла ў засценках час, то не больш за трое сутак. Былі звязаныя пытанні да яе з мінулымі месцамі працы ці арышт быў вынікам прыгодаў мужа, невядома», — піша «Наша Ніва».
Цяпер Лазарэвіч 44 гады. Яна зрабіла імклівую кар’еру. У 27 гадоў стала начальніцай фінансавага ўпраўлення на Беларускім тэлебачанні. Потым была служба ў «Салеа» Аляксандра Шакуціна, нарэшце — кабінет генеральнага дырэктара «Бабруйскаграмаша».
У 2020-м Лазарэвіч стала агітатаркай за Лукашэнку на Магілёўшчыне, яго даверанай асобай. У месяц пачатку вайны яе паднялі ў сталіцу, у намесніцы мэра Мінска, а праз год і ў першыя намесніцы. Пазней узнагародзілі медалём «За працоўныя заслугі».
Таксама яна стала намесніцай старшыні Беларускага саюза жанчын.