У Чарнагорыі абмяркоўваюць увядзенне візаў для грамадзян Беларусі і Расіі, каб адаптаваць свае правілы ўезду да палітыкі Шэнгенскай зоны. Візавы рэжым для беларусаў і расіян можа быць уведзены «найбліжэйшым часам», паведамляе чарнагорская газета Dan са спасылкай на шматлікія крыніцы ва ўрадзе краіны.
Паводле звестак выдання, Чарнагорыі як кандыдату на ўступленне ў ЕС трэба будзе правесці сур’ёзныя рэформы ў сферы візавай палітыкі, у тым ліку гарманізацыю з правіламі, якія дзейнічаюць у Шэнгенскай зоне. На гэтым настойваюць еўрапейскія чыноўнікі, аднак канкрэтныя тэрміны ўвядзення змяненняў не называюцца.
Сярод іншага ЕС патрабуе ад кандыдатаў на ўступленне ўвесці візавы рэжым у дачыненні да грамадзян трэціх краін, якім неабходна атрымліваць візы для ўезду ў дзяржавы Еўрасаюза. У ліку такіх краін — Расія, Беларусь, Кітай, Іран і іншыя.
Адзначым, што цяпер беларусы могуць знаходзіцца ў Чарнагорыі без візы 30 дзён. Для даўжэйшага знаходжання неабходна афармляць візу ў амбасадзе ў Маскве.
Выданне падкрэслівае, што ўвядзенне візаў для грамадзян Беларусі і Расіі можа прыкметна паўплываць на прыток турыстаў з гэтых краін, а таксама скараціць іх значны ўнёсак у мясцовую эканоміку.
З іншага боку, для еўраінтэграцыі Чарнагорыі неабходна адаптаваць сваю палітыку да правілаў Шэнгенскай зоны. Да таго ж газета адзначае рост напружанасці ў адносінах паміж Чарнагорыяй і Расіяй, дзе ў апошнія гады практыкуюць узаемнае высыланне дыпламатаў.
Застаецца імавернасць таго, што балканская дзяржава будзе дабівацца канкрэтных дамоўленасцяў для асобных краін падчас перамоваў наконт уступлення ў ЕС. Але шанцы на тое, што еўрапейскія чыноўнікі пагодзяцца на сур’ёзныя саступкі, адносна невялікія, падсумоўвае выданне.
Чытайце таксама
