Аўтамабілі кітайскага брэнда AVATR, увезеныя ў Беларусь па шэрых схемах, з 30 лістапада могуць аказацца заблакаванымі. На такі радыкальны крок вытворца вырашыў пайсці, каб спыніць неафіцыйныя пастаўкі сваіх аўто ў іншыя краіны, паведамляе Telegraf.news са спасылкай на кампанію «Аўтавельт» — афіцыйнага дыстрыб’ютара AVATR у Беларусі.
Як растлумачылі ў «Аўтавельце», па сутнасці, усе аўтамабілі AVATR, увезеныя ў краіну не праз афіцыйных дылераў, пасля адключэння ўсіх сеткавых функцый ператворацца ў «цагліны». Гаворка ідзе галоўным чынам пра аўто, якія выпускаліся для кітайскага рынку, але нейкім чынам абышлі забарону на экспарт і «выцеклі» з Паднябеснай.
Сама забарона на экспарт AVATR, прызначаных для кітайскага рынку, дзейнічае не першы месяц — яшчэ ў верасні 2024 года дылеры атрымалі адпаведнае тлумачэнне. За парушэнне забароны «санкцыямі» пагражалі як прадаўцам, так і самім уладальнікам аўто. Першыя за продаж такіх аўто маглі страціць статус афіцыйнага дылера, другія — застацца без сэрвіснага абслугоўвання і функцыянальнай машыны.
Як растлумачылі ў офісе беларускага дылера, у выпадку блакавання ні ўладальнікі аўто, ні дыстрыб’ютар, які парушыў правілы, самі не змогуць разблакаваць машыну.
«У AVATR выкарыстоўваюць прасунутыя сістэмы шыфравання дадзеных, якія выключаюць несанкцыянаваны доступ да функцый машыны», — адзначылі ў «Аўтавельце».
Нагадаем, са снежня 2024 года ў Беларусі мусяць пачацца афіцыйныя продажы трох мадэляў брэнда AVATR, якія будуць пастаўляцца наўпрост з завода кампаніі Changan у кітайскім Чунцыне.