Сустрэча Віктара Бабарыкі з Раманам Пратасевічам, хутчэй за ўсё, адбылася ў кабінеце адміністрацыі. Пра гэта «Люстэрку» расказаў экс-палітвязень, які адбыў тэрмін у ПК-1 у Наваполацку.
Паводле словаў Ігара (імя змененае дзеля яго бяспекі), на фота і відэа, апублікаваных Раманам Пратасевічам, відавочна не пакой для доўгіх спатканняў. На іх мужчына быў і памятае, што такія памяшканні выглядаюць інакш. Да таго ж у іх няма канапаў, толькі ложкі.
У экс-палітвязня ёсць два варыянты адносна таго, дзе праходзіла сустрэча з Бабарыкам: ці ў кабінеце псіхолага, ці ў кабінеце ў будынку адміністрацыі (альбо «штаба», як яго называлі супрацоўнікі калоніі).
— У начальніка псіхалагічнай службы ў кабінеце канапы няма, — успамінае мужчына. — Але там ёсць пакой, дзе праводзяцца псіхалагічныя трэнінгі, яшчэ нешта. І я памятаю, што там былі канапы, але не памятаю, якога колеру.
У адміністрацыйным будынку, які знаходзіцца за ўнутранай брамай калоніі, Ігар быў некалькі разоў. Такога кабінета, як на фота, мужчына не памятае, але ў цэлым інтэр'ер, кажа ён, падобны.
— У кабінеце намесніка па рэжыме і аператыўнай працы і ў кабінеце аператыўнага супрацоўніка падчас прыезду следчага такіх канапаў не было, — кажа экс-палітвязень. — Даволі незвычайна, што стаіць маленькі столік, які мусіць ствараць як бы прыхільную атмасферу. Хутчэй за ўсё, гэта кабінет вышэйшага начальства, непасрэдна начальніка калоніі ці пакой адпачынку супрацоўнікаў.
Ігар таксама ўпэўнены, што Віктара Бабарыку рыхтавалі да сустрэчы з Пратасевічам. Суразмоўца «Люстэрка» адзначае, што на палітыку звычайная атрадная форма, а не тая, у якой сядзяць у ШІЗА і ПКТ. Таксама ён звяртае ўвагу на гадзіннік. Калі б палітвязня прывялі на сустрэчу з ШІЗА, гадзінніка б не было.
Чаму Ігар лічыць, што Бабарыка быў у ПКТ ці ШІЗА? Ён адзначае, што нядаўна вызваленыя з ПК-1 расказвалі: у атрадзе яго не бачылі даўно.
— Пры мне (суразмоўца выйшаў на волю ў канцы 2023 года. — Заўв. рэд.) Дзмітрыча (так Віктара Бабарыку называюць у калоніі. — Заўв. рэд.) вадзілі толькі ў медсанчастку вечарамі. У асноўным ён увесь час знаходзіўся ў будынку ШІЗА і ПКТ, — успамінае ён. — І я ўдакладняў у хлопцаў, якія вызваліліся ў канцы года, што ў атрад яго так і не вярталі.
Чытайце таксама
