Пасля невялікага перапынку Расія зноў нанесла масіраваны ўдар па энергасістэме Украіны. Як паведаміў камандуючы Паветранымі сіламі УСУ Мікалай Аляшчук, праціўнік выкарыстаў 76 сродкаў паветранага нападу.
Расія атакавала Украіну ноччу і ранняй раніцай 8 траўня. Выбухі гучалі ў цэнтральнай, паўднёвай і заходніх абласцях Украіны.
«Вораг не адмаўляецца ад планаў пазбавіць украінцаў святла. Зноў масіраваная атака на нашую энергетыку! Атакавалі аб’екты генерацыі і перадачы электраэнергіі ў Палтаўскай, Кіраваградскай, Запарожскай, Львоўскай, Івана-Франкоўскай, Вінніцкай абласцях.
Наступствы высвятляюцца. Энергетыкі ўжо працуюць над іх ліквідацыяй», — паведаміў міністр энергетыкі Украіны Герман Галушчанка.
У ДТЭК адзначылі, што сур’ёзна пашкоджаныя тры ЦЭС кампаніі.
«Гэта ўжо пяты масіраваны абстрэл энергетычных аб’ектаў кампаніі за апошнія паўтара месяца. Апошні раз вораг атакаваў цеплаэлектрастанцыі ДТЭК падчас масіраваных атак 22 і 29 сакавіка, 11 і 27 красавіка», — заявілі ў ДТЭК. У кампаніі дадалі, што з пачатку вайны праз абстрэлы станцый быў паранены 51 работнік, тры энергетыкі загінулі.
Ратавальнікі тушаць пажар у Браварскім раёне. Відэа: МУС УкраіныАхвярамі абстрэлу ў рэгіёнах сталі мірныя жыхары. У Кіраваградскай вобласці траўмаванае 8-гадовае дзіця, у Запарожскай вобласці паранены адзін чалавек, у Браварскім раёне Кіеўскай вобласці — двое пацярпелых.
76 сродкаў паветранага нападу
У Паветраных сілах Украіны паведамілі, што расійская армія выкарыстала для ўдару па Украіне 76 сродкаў паветранага нападу — 55 ракет і 21 ударны беспілотнік.
У тым ліку аэрабалістычную ракету Х-47М2 «Кінжал», дзве балістычныя ракеты «Іскандэр-М», чатыры крылатыя ракеты «Калібр», а таксама ракеты Х-101/Х-55, кіравальныя авіяцыйныя ракеты Х-59/Х-69.
Знішчальная авіяцыя, зенітныя ракетныя войскі Паветраных сіл, мабільныя агнявыя групы і падраздзяленні радыёэлектроннай барацьбы Сіл абароны Украіны знішчылі 59 паветраных цэляў. Гэта ракеты Х-101/Х-555, «Калібр», кіравальныя авіяцыйныя ракеты Х-59/Х-69 і 20 «Шахедаў».
Прэзідэнт Украіны Уладзімір Зяленскі адзначыў, што Расія нанесла ўдар у дзень памяці і перамогі над нацызмам у Другой сусветнай вайне.
«Увесь свет мусіць дакладна разумець, хто ёсць хто. Увесь свет не мае права даць яшчэ адзін шанец нацызму», — заявіў Зяленскі.
