Расійскае судна Ursa Major затанула ў Міжземным моры пасля выбуху

Расійскае гандлёвае судна Ursa Major (з лаціны — «Вялікая Мядзведзіца») затанула ў міжнародных водах паміж Іспаніяй і Алжырам, паведамляе РБК са спасылкай на профільныя рэсурсы.

Двое чальцоў экіпажа зніклі без вестак, астатніх 14 чалавек удалося выратаваць службе ратавання марскіх судоў, іх даставілі ў іспанскі горад Картахена.

Напярэдадні, калі Ursa Major ішло на ўсход да Гібралтарскага праліва, на судне адбыўся выбух у машынным аддзяленні, пасля чаго яно адышло ад курсу і пачало хіліцца, паведамляюць выданні.

Ursa Major адплыло 11 снежня з Санкт-Пецярбурга і скіроўвалася ва Уладзівасток, куды мусіла прыбыць 22 студзеня, вынікае са звестак сэрвісу для адсочвання суднаў Marine Traffic.

Капітан судна заявіў, што на момант аварыі яно перавозіла пустыя кантэйнеры.

Аднак за чатыры дні да затаплення прэс-служба «Абаронлагістыкі» расказала пра адпраўку Ursa Major на Далёкі Усход з «вялікім праектным грузам у рамках рэалізацыі дзяржаўных задач па развіцці партовай інфраструктуры і Паўночнага марскога шляху». На судна пагрузілі партовыя краны вагой 380 т кожны, неабходныя для пашырэння тэрмінала ва Уладзівастоку, і 45-тонныя люкавыя вечкі для новых ледаколаў.

Ursa Major — універсальны сухагруз, знаходзіўся ў эксплуатацыі ў «дачкі» расійскай абароннай кампаніі «Абаронлагістыка». Гэта яе самае вялікае судна, якое дазваляе перавозіць грузы вагой да 1200 т. Даўжыня судна — 142 м, шырыня — 23 м, асадка — 7 м.

«Абаронлагістыка» ўваходзіць у структуру ваенна-будаўнічага комплексу Мінабароны Расіі, займаецца забяспечаннем патрэбаў вайсковага ведамства па транспартаванні, захоўванні і вытворчасці прадукцыі ваеннага і спецыяльнага прызначэння.