Прэзідэнт Казахстана Касым-Жамарт Такаеў, выступаючы на сесіі Савета калектыўнай бяспекі АДКБ у вузкім складзе, раскрытыкаваў частыя заявы краін — уздзельніц арганізацыі пра рост пагрозаў. Тэкст яго прамовы апублікавала прэс-служба казахстанскага лідара.
Касым-Жамарт Такаеў падкрэсліў, што падзяляе заклапочанасць партнёраў па АДКБ што да ўзроўню традыцыйных пагроз, уключаючы рост абароту наркотыкаў, зброі, транпамежнай злачыннасці і нелегальнай міграцыі.
— Выбудоўваючы тактыку і стратэгію дзейнасці АДКБ, мы, безумоўна, мусім улічваць пагрозы і выклікі сучасных рэалій. Разам з тым, на маю думку, няма неабходнасці пастаянна гаварыць пра пагрозы бяспецы дзяржаваў — удзельніц АДКБ, нават калі такія існуюць. Пагрозы заўсёды былі. Такая сутнасць міжнароднай супольнасці. Частыя заявы на гэтую тэму нараджаюць ілюзію, быццам мы кагосьці баімся, — адзначыў прэзідэнт Казахстана.
Такаеў падкрэсліў, што «такія заявы могуць таксама атрымаць і, відаць, ужо атрымліваюць цалкам няслушную інтэрпрэтацыю».
— Рыторыка арганізацыі мусіць быць жорсткай, але памежна карэктнай, з улікам уласнай годнасці дзяржаваў-удзельніц і іх аб’яднанага ваенна-палітычнага патэнцыялу і моцы. АДКБ паказала свае поспехі як аўтарытэтная вайскова-палітычная арганізацыя, але наперадзе стаяць новыя задачы, якія мусяць адпавядаць канструктыўнаму настрою яе дзяржаваў-удзельніц, — падкрэсліў лідар Казахстана.
Нагадаем, доўгую тыраду «сучасным выклікам і пагрозам» на сесіі АДКБ, якая прайшла 23 лістапада ў Мінску, прысвяціў Аляксандр Лукашэнка. У сваім выступе ён заявіў, што «нас ужо закруціў віхор змены эпох».
— Сучасныя выклікі і пагрозы носяць глабальны характар. Больш за тое, яны сплятаюць нашыя нацыянальныя інтарэсы ў адзін вузел, — сказаў Лукашэнка і перайшоў да «магістральнай тэмы» сваіх выступаў — «змены эпох», якая, на яго думку, закруціла ўвесь свет, разбурае «аднапалярную заходнецэнтрычную мадэль».
Лукашэнка выказаў упэўненасць, што гэты «драматычны пераход» звязаны з тым, што «заходнія палітыкі не хочуць саступаць сваіх пазіцый».
— Міжнароднае права працуе выключна для абраных. На фоне адыёзнай ваяўнічай рыторыкі асобных палітыкаў і поўнай страты ўзаемнага даверу ідзе мэтаскіраванае раскручванне спіралі новай гонкі ўзбраенняў. Пажар рэгіянальных канфліктаў, з выкарыстаннем у тым ліку найноўшых сістэм узбраенняў, у любы момант можа перакінуцца ў іншыя краіны, — заявіў Лукашэнка.