У Мінску банкрутуе вытворца офіснай і гандлёвай мэблі «Мебелінк». У кампаніі набралася даўгоў на 2 млн рублёў. Гэта вынікае са звестак Адзінага дзяржрэестра звестак пра банкруцтва.
25 лютага ў Эканамічным судзе Мінска разгледзелі справу пра банкруцтва кампаніі «Мебелінк», якая працавала пад гандлёвай маркай ProTrade і ўваходзіла ў свабодную эканамічную зону «Мінск». Заяву пра эканамічную неплацежаздольнасць падалі самі ўладальнікі. Яны ўдакладнілі, што фірма па сутнасці не працуе, а ўся маёмасць на суму 35 тыс. рублёў проста ляжыць на складзе.
У снежні мінулага года да кампаніі далучылі «ЕвроСтильМебель», якая займалася рамонтам мэблі.
Агульная сума даўгоў перавышае 2 млн рублёў. З іх больш за паўмільёна — гэта пазычанасць па падатках і зборах.
Суд распачаў справу пра банкруцтва і ўвёў ахоўны перыяд. Гэта працэдура, падчас якой правяраюць, ці сапраўды кампанія не можа плаціць па даўгах. У гэты перыяд вывучаюць заяву пра банкруцтва, правяраюць фінансавы стан даўжніка і вырашаюць, ці ёсць законныя падставы для пачатку працэсу банкруцтва.
Кампанія «Мебелінк» была адным з лідараў беларускага рынку ў сваім кірунку. Яна пастаўляла мэблю ў офісы многіх вядомых кампаній, уключаючы Wargaming, «Мілавіцу», «Белтрансгаз», «Атлант», «Санта Брэмар», банкі і дзяржаўныя ведамствы.
«Выратаваць ProTrade не ўдалося. Хоць я змагаўся да апошняга рубля», — напісаў яшчэ ў снежні мінулага года суўладальнік і дырэктар фірмы Алег Надзін на сваёй старонцы ў Facebook. Бізнесовец таксама патлумачыў, што «кампанія не справілася з валютным крэдытам, а пастаянны адток значных грашовых сродкаў прывёў да фінансавага і кадравага знясілення».
Чытайце таксама
