Аляксандр Лукашэнка на нарадзе па кадравых пытаннях 17 студзеня заклікаў скончыць «пертурбацыі і рэарганізацыі» ў сістэме адукацыі, перадае прэс-служба.
— Мы задумалі вельмі сур’ёзную рэарганізацыю, перш за ўсё ў сістэме адукацыі. Пра гэта я ўжо не аднойчы казаў. Але выснова была адназначная. Час гэтыя ўсе пертурбацыі і рэарганізацыі заканчваць, — сказаў Аляксандр Лукашэнка.
Ён нагадаў, што раней даручаў выйсці на канчатковае рашэнне. Неабходна было сур’ёзна паглядзець на Міністэрства адукацыі, каб там не было лішніх структур.
У прыватнасці, гэта датычыць працы Дэпартамента кантролю якасці адукацыі і нядаўна створанага Нацыянальнага агенцтва па забяспечанні якасці адукацыі.
— Быў дэпартамент. Потым перакінуць [функцыі], зрабіць упраўленне — не патрэбны гэты дэпартамент. Але ствараюць паралельна агенцтва, — адзначыў Аляксандр Лукашэнка. — Ну дык, а ў чым тады розніца, у чым сэнс?
Сяргей Каспяровіч, прызначаны на пасаду рэктара Брэсцкага дзяржаўнага тэхнічнага ўніверсітэта, а да сённяшняга дня — начальнік галоўнага ўпраўлення прафесійнай адукацыі Мінадукацыі, далажыў, што па агенцтве праца толькі пачынаецца: набраныя штаты, задача ў новай структуры вялікая — забяспечваць якасць на ўсіх узроўнях адукацыі.
— Дык дэпартамент з гэтым не спраўляўся? — спытаў Лукашэнка.
— У прынцыпе, спраўляўся. У яго шмат задач. І ліцэнзаванне, і апастыль, — адказаў Каспяровіч.
— Дык вы ўсё перадалі ў агенцтва… — заўважыў Лукашэнка.
— Цяпер, фактычна, так. Частка функцый перададзеная ў агенцтва. (…) Прапановы, якія ідуць цяпер, палягаюць на тым, каб дэпартамент уключыць у склад міністэрства ў выглядзе глаўка. То-бок гэта паўнавартасная дзяржаўная структура ўжо ўнутры міністэрства. Не асобная юрыдычная асоба, — растлумачыў ён. — Што да дэпартамента, які можа стаць глаўкам, — гэта задача зноў жа ліцэнзавання, апастылю. Агенцтву прапануецца праводзіць, наколькі я разумею, сістэмную работу па забяспечанні якасці: акрэдытацыі, праверкі якасці, праверкі прыватных установаў адукацыі па ўсіх узроўнях.
Аляксандр Лукашэнка звярнуў увагу на тое, што ў такім выпадку фактычна нічога не мяняецца.
— Што было, тое і засталося. Грошы плаціць агенцтву трэба? Трэба. Плаціць трэба людзям. Вы ж там 35 ці колькі чалавек набралі. Вось зрабілі справу, — абурыўся Лукашэнка.
Ён удакладніў, ці можа з функцыямі, якія ўскладаюцца на агенцтва, справіцца адпаведнае профільнае ўпраўленне ў сістэме Мінадукацыі.
— Упраўленне са штатам чыноўнікаў, дапусцім, 8−10 чалавек… — пачаў адказваць Сяргей Каспяровіч.
— Не, я не кажу цяпер пра колькасць. Трэба — дык і 200 будзе, — перапыніў Аляксандр Лукашэнка.
— Справіцца. Калі дастатковы рэсурс, — адрэагаваў спецыяліст.
— Я не разумею сутнасці гэтай усёй пертурбацыі. Добра, тут у вас ва ўпраўленні (у структуры Мінадукацыі. — Заўв. рэд.) 8 чалавек. А ў агенцтве 35. І яно справіцца. Дык вы забярыце 35. Нават не 35, а 30 можаце забраць. Плюс гэтых 8. І спраўляйцеся. Калі ёсць парадак і дысцыпліна, адзін чалавек справіцца. А калі бардак, дык вы там і 200 чалавек пасадзіце — толку не будзе, — сказаў Аляксандр Лукашэнка. — Слухайце, ну так, прэзідэнт запатрабаваў там і іншае (упарадкаваць структуру міністэрства. — Заўв. рэд.). Замест дэпартамента — ўпраўленне. А дэпартамент так і застаўся. Ніякага замест. Толькі яго назвалі агенцтва, выкінулі з міністэрства і ніводнага дзяржслужбоўца. Выканалі дзве задачы. Здаецца, парадак навялі ў структуры кіравання і з дзяржслужбоўцамі разабраліся (аптымізацыя колькасці. — Заўв. рэд.). А насамрэч, калі паглядзець углыб, горш зрабілі, мне здаецца.
