У Кіеве цэняць тое, што Узброеныя сілы Беларусі не бяруць непасрэднага ўдзелу ў расійскай агрэсіі супраць Украіны. Пра гэта ў інтэрв'ю РБК-Украіна расказаў сакратар Рады нацыянальнай бяспекі і абароны Украіны Аляксей Данілаў.
Данілаў падкрэсліў, што Беларусь пакуль устрымліваецца ад удзелу ў вайне, «нягледзячы на тое, што акупаваная з боку Расійскай Федэрацыі ўжо доўгі прамежак часу, эканамічна і па многіх іншых пытаннях».
— Беларусы пакуль не паддаюцца, у іх няма ніякага жадання ваяваць з намі. І тое, што яны сёння не бяруць непасрэднага ўдзелу ва ўзброенай агрэсіі, менавіта Узброеныя сілы Беларусі, мы гэта належным чынам ацэньваем, — сказаў Данілаў.
Палітык адзначыў, што некаторыя «гарачыя галовы» ва Украіне кажуць, што «трэба тэрмінова разгортваць войска і ісці на Беларусь і гэтак далей».
— Я хачу, каб мы ўсведамлялі, што для нас гэта вельмі небяспечная сітуацыя з улікам таго, што мы сёння маем велізарную лінію фронту менавіта з РФ. Я аддзяляў бы беларускі народ ад беларускіх уладаў. Многія беларусы ваююць на нашым баку, і мы за гэта ім удзячныя. І не толькі беларусы, ёсць і нашыя браты грузіны, якія ваююць на нашым баку, нягледзячы на тое, што кіраўніцтва Грузіі займае нейкую даволі неадназначную пазіцыю. У пачатку ўварвання РФ у сакавіку я казаў, што калі б грузіны пачалі вызваляць сваю тэрыторыю, нам было б лягчэй. Але яны неяк так, мякка кажучы, даволі спакойна да гэтага ставяцца. Гэта залежыць ад кіраўніцтва краіны, якое, на жаль, дэманструе сваю прарасійскасць.
Данілава таксама спыталі, ці спрабуе прэзідэнт Расіі Уладзімір Пуцін яшчэ ціснуць на Лукашэнку, каб неяк актыўней задзейнічаць беларускае войска ў вайне супраць Украіны.
— Лукашэнка стаў прэзідэнтам краіны ў 1994 годзе пасля пасады кіраўніка саўгаса. І ні дня гэтай пасады не пакідаў. Не трэба лічыць, што ён такі просты. Гэта шматгранны чалавек. І нягледзячы на тое, што Пуцін увесь час хоча яго ўмоўна «згвалціць», каб ён прыняў тыя ці іншыя патрэбныя РФ пастановы, Лукашэнка разумее, чым гэта ўсё можа скончыцца. І таму я не думаю, што Пуціну ўдасца яго даціснуць. Нават не ведаю, што мусіць адбыцца, каб Пуціну гэта ўдалося, — сказаў сакратар РНБА.
