Ужо ў гэты чацвер у Беларусі пройдуць апошнія званкі. Праўда, канцом года гэта будзе толькі для дзевяці- і адзінаццацікласнікаў — астатнім яшчэ давядзецца давучыцца да 31 траўня. Але свята, паводле рашэння Мінадукацыі, адбудзецца менавіта 25 траўня. А наступная ўрачыстасць — выпускныя вечары — прызначаная на 10 чэрвеня. Як звычайна, улады ўводзяць у гэтыя дні забарону на продаж алкаголю, але ўсюды яны вызначаныя па-рознаму, а месцамі іх няма зусім. Мы сабралі ўсе абмежаванні ў адпаведнасці з апублікаванымі на гэты момант рашэннямі выканкамаў.
У большасці раёнаў і гарадоў забарона гандляваць алкаголем будзе дзейнічаць і 25 траўня, і 10 чэрвеня. У іншых пакуль не прынятае рашэнне што да выпускных, у частцы раёнаў наогул не ўведзеныя забароны (прынамсі, пакуль). А ў некаторых «дзён цвярозасці» за гэты кароткі адрэзак будзе нават не два, а тры — месцамі ўлады вырашылі дадаткова прызначыць іх на 31 траўня або 1 чэрвеня для прапаганды здаровага ладу жыцця і да Дня абароны дзяцей.
Як правіла, у рашэннях выканкамаў адзначаецца, што абмежаванні не распаўсюджваюцца на куплю алкаголю для вяселляў, юбілеяў, рытуальных абрадаў. Таксама застаецца дазволеным продаж алкаголю на разліў у аб’ектах грамадскага харчавання.
Брэсцкая вобласць
У Брэсце не прададуць алкаголь 25 траўня і 31 траўня з 0 да 24 гадзін, а таксама 10 чэрвеня з 8.00 да 8.00 наступнага дня. Па рэгіёне «дні цвярозасці» такія:
- Брэсцкі, Бярозаўскі, Драгічынскі, Маларыцкі, Пружанскі раёны — 25 траўня з 0 да 24 гадзін, 10 чэрвеня з 8.00 да 8.00 наступнага дня;
- горад Баранавічы — 25 траўня і 10 чэрвеня з 8.00 да 8.00 наступнага дня;
- Баранавіцкі, Івацэвіцкі, Ляхавіцкі раёны — 25 траўня з 0 да 24 гадзін, 10 чэрвеня з 8.00 да 24.00;
- Ганцавіцкі, Іванаўскі, Камянецкі, Кобрынскі, Столінскі раёны — 25 траўня і 10 чэрвеня з 0 да 24 гадзін;
- Жабінкаўскі раён — з поўначы 25 траўня да 8.00 26 траўня, з 8.00 10 чэрвеня да 8.00 11 чэрвеня;
- Лунінецкі раён — 25 траўня і 10 чэрвеня з 8 да 24 гадзін;
- горад Пінск — 10 чэрвеня з 8.00 да 8.00 наступнага дня;
- Пінскі раён — 10 чэрвеня з 0 да 24 гадзін.
Віцебская вобласць
У Віцебску забаранілі толькі продаж алкаголю з утрыманнем спірту ад 7% 10 чэрвеня з 15.00 да 24.00. Адпаведна, піва пад забарону не трапляе.
«Дні цвярозасці» ў рэгіёне пройдуць паводле самых разнастайных графікаў:
- Докшыцкі, Лёзненскі, Аршанскі, Шаркаўшчынскі, Шумілінскі раёны — 25 траўня і 10 чэрвеня з 0 да 24 гадзін;
- Бешанковіцкі раён — 25 траўня з 7.00 да 19.00, 10 чэрвеня з 14.00 да 24.00;
- Верхнядзвінскі раён — 25 траўня з 8.00 да 11.00, 10 чэрвеня з 16.00 да 24.00;
- Мёрскі раён — 25 траўня з 0 да 24 гадзін, 10 чэрвеня з 17.00 да 24.00;
- Талачынскі раён — 25 траўня з 7.00 да 15.00, 10 чэрвеня з 17.00 да 24.00;
- Дубровенскі раён — 10 чэрвеня з 0 да 24 гадзін;
- Сенненскі раён — 25 траўня, 1 чэрвеня і 10 чэрвеня з 0 да 24 гадзін;
- Ушацкі раён — 31 траўня і 10 чэрвеня з 0 да 24 гадзін.
Па астатніх раёнах знайсці свежыя рашэнні выканкамаў не ўдалося. Аднак у вобласці дзейнічае агульнае рашэнне ўладаў рэгіёна ад 2021 года пра тое, што ў дні апошніх званкоў і выпускных забараняецца продаж слабаалкагольных напояў і піва крэпасцю да 7% з 8.00 да 8.00 наступнага дня.
Гомельская вобласць
На Гомельшчыне аблвыканкам сёлета таксама прыняў рашэнне для ўсёй тэрыторыі вобласці, што ў дні апошніх званкоў і выпускных абмежаванні на продаж алкаголю слабаалкагольных напояў і піва крэпасцю да 7% уводзяцца з 8.00 і дзейнічаюць суткі. Дадаткова амаль кожны раённы выканкам увёў шырэйшую забарону на продаж любога алкаголю 25 траўня і 10 чэрвеня з 8.00 да 8.00 наступнага дня. Такі графік і ў самім Гомелі, і ў Гомельскім раёне.
Але ёсць і выключэнні — у Ельскім, Жыткавіцкім, Лельчыцкім, Мазырскім раёнах прызначылі дадатковы «дзень цвярозасці» на 31 траўня — з 8.00 і да 8.00 1 чэрвеня.
Гродзенская вобласць
Гродзенскі аблвыканкам яшчэ ў 2009 годзе прыняў рашэнне абмежаваць продаж слабаалкагольных напояў (да 7%) і піва ў дні апошніх званкоў і выпускных вечароў з 8.00 да 8.00 наступнага дня. Адпаведна, такая забарона мусіць дзейнічаць ва ўсіх раёнах.
Умовы могуць адрознівацца: у Лідскім раёне, напрыклад, загадам аддзела адукацыі забаранілі прадаваць слабаалкагольныя напоі ўжо з 23 траўня і да раніцы 26 траўня. Знайсці графік па кожным раёне нам не ўдалося — прапануем сачыць за мясцовымі СМІ і абвесткамі ў крамах.
У Гродне ж пакуль што прызначаныя «дні цвярозасці» на 25 і 31 траўня з 8 раніцы да 8 раніцы наступнага дня. Абмежаваны продаж менавіта слабага алкаголю. Калі летась гарадскія ўлады забаранялі прадаваць у дзень выпускных, 10 чэрвеня, таксама і мацнейшыя напоі, то сёлета такога дакумента пакуль не публікавалі.
Мінская вобласць
У Мінску, як і летась, продаж алкаголю вырашылі не забараняць зусім — ён будзе дазволены і 25 траўня, і 10 чэрвеня. А вось ва ўсіх раёнах Мінскай вобласці абмежаванні ўведзеныя. «Дні цвярозасці» пройдуць паводле наступнага графіку:
- Мінскі і Салігорскі раёны — 25 траўня, 31 траўня і 10 чэрвеня з 8.00 да 8.00 наступнага дня;
- Бярэзінскі раён — 25 траўня і 10 чэрвеня з 0 да 24 гадзін;
- Лагойскі раён — 10 чэрвеня з 8.00 да 8.00 наступнага дня;
- Старадарожскі раён — 25 траўня з 0 да 24 гадзін, 10 чэрвеня з 8.00 да 8.00 наступнага дня;
- усе астатнія раёны вобласці — 25 траўня і 10 чэрвеня з 8.00 да 8.00 наступнага дня.
Магілёўская вобласць
У Магілёве і Магілёўскім раёне абмежаванні будуць дзейнічаць 25 траўня і 10 чэрвеня з поўначы да 24 гадзін. А вось у другім найбуйнейшым горадзе вобласці, Бабруйску, а таксама ў Бабруйскім раёне забарону на продаж алкаголю ўвялі яшчэ ў студзені на чатыры дні ў годзе, але чамусьці не на дні выпускных і апошніх званкоў.
У іншых раёнах графік забаронаў такі:
- Глускі, Клімавіцкі, Чавускі раёны — 25 траўня, 31 траўня і 10 чэрвеня з 0 да 24 гадзін;
- Клічаўскі, Касцюковіцкі, Краснапольскі, Асіповіцкі, Слаўгарадскі, Хоцімскі раёны — 25 траўня і 10 чэрвеня з 0 да 24 гадзін;
- Бялыніцкі раён — 31 траўня і 10 чэрвеня з 0 да 24 гадзін;
- Горацкі раён — 25 траўня з 12.00 да 24.00, 10 чэрвеня з 0 да 24 гадзін;
- Дрыбінскі раён — 25 траўня і 31 траўня з 0 да 24 гадзін;
- Кіраўскі раён — 1 чэрвеня і 10 чэрвеня з 0 да 24 гадзін;
- Крычаўскі раён — 25 траўня з 0 да 24 гадзін, 10 чэрвеня з 17.00 да 24.00;
- Круглянскі раён — 10 чэрвеня з 0 да 24 гадзін;
- Чэрыкаўскі раён — з 17.00 10 чэрвеня да 8.00 11 чэрвеня.
Па астатніх раёнах апублікаваных рашэнняў выканкамаў няма, тым не менш забароны могуць быць уведзеныя і там — лепш сачыць за інфармацыяй на месцах.