Мінскі гарадскі суд вынес прысуд палітвязню Андрэю Савінскаму, абвінаваціўшы яго ў распальванні сацыяльнай варожасці (ч.1 арт. 130 КК) і фінансаванні экстрэмісцкай дзейнасці (ч. 1 і ч. 2 арт. 361−2 КК). Справу разглядала суддзя Вера Галукова. Пра суд над палітвязнем расказала «Вясна».
Спачатку Андрэя Савінскага затрымалі па адміністрацыйнай справе і асудзілі на 15 сутак арышту па артыкуле 19.11 КаАП (Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці), але пасля адбыцця пакарання яго не выпусцілі. Да суда ён утрымліваўся пад вартай у СІЗА № 1 Мінска.
Судовы працэс пачаўся 26 кастрычніка 2023 года і доўжыўся да 15 лістапада. Прысуд стаў вядомы толькі цяпер.
Паводле абвінаваўчага заключэння, Савінскі за паўтара года перавёў на рахункі неназваных фондаў, прызнаных «экстрэмісцкімі», суму, эквівалентную 50 далярам. Для гэтага ён неаднаразова карыстаўся сваім уліковым запісам у Facebook.
Сцвярджаецца, што мужчына таксама стварыў і размясціў у адным з чатаў у Telegram чатыры тэкставыя паведамленні, нібыта скіраваныя на распальванне сацыяльнай варожасці ў грамадстве.
Мінчука прызналі вінаватым па двух артыкулах КК (ч.1 арт. 130 КК, а таксама ч. 1 і ч. 2 арт. 361−2 КК) і па сукупнасці прызначылі пакаранне ў выглядзе пазбаўлення волі на тэрмін 5 гадоў з адбываннем у папраўчай калоніі ва ўмовах узмоцненага рэжыму, а таксама штраф у памеры 200 базавых велічынь (7400 рублёў).
Чытайце таксама
