У Міністэрстве абароны Расіі заявілі, што масіраваны ўдар па Украіне ў ноч на 9 сакавіка нанеслі «ў адказ на арганізаваныя 2 сакавіка кіеўскім рэжымам тэрарыстычныя акцыі ў Бранскай вобласці».
— Высокадакладнай зброяй вялікай далёкасці паветранага, марскога і наземнага базавання, у тым ліку гіпергукавым ракетным комплексам «Кінжал», нанесеныя ўдары па ключавых элементах ваеннай інфраструктуры Украіны, прадпрыемствах абаронна-прамысловага комплексу, а таксама аб’ектах энергетыкі, якія забяспечваюць іх. Мэта ўдару дасягнутая. Усе прызначаныя аб’екты пабітыя, — заявілі ў расійскім Мінабароны.
У ведамстве сцвярджаюць, што білі па месцах базавання ўдарных беспілотных лётных апаратаў, сарвалі перакідванне рэзерваў і перавозку замежнага ўзбраення, а таксама вывелі з ладу вытворчыя магутнасці па рамонце ваеннай тэхнікі і вытворчасці боепрыпасаў.
Ва Украіне расказалі, што ўдар наносіўся па аб’ектах крытычнай інфраструктуры. У выніку былі пашкоджаныя тры ЦЭЦ, цалкам абясточаная Запарожская АЭС. Загінулі прынамсі шэсць мірных жыхароў.
Нагадаем, 2 сакавіка з’явіліся паведамленні, што на тэрыторыю Бранскай вобласці пранікла ўкраінская дыверсійная група. Распаўсюджвалася супярэчлівая інфармацыя, што дыверсанты ўзялі закладнікаў (называліся дзве розныя вёскі), узарвалі ў адной з вёсак электрападстанцыю і газавую станцыю. Аднак мясцовыя ўлады інфармацыі пра закладнікаў не пацвердзілі.
Адказнасць за атаку на сябе ўзялі прадстаўнікі Рускага добраахвотніцкага корпуса (падраздзяленне расійскіх добраахвотнікаў, якія ваююць за Украіну). На распаўсюджаным відэа яны заявілі, што не ваююць з цывільнымі і не забіваюць бяззбройных, а на тэрыторыю РФ «прыйшлі вызваляць», і заклікалі брацца за зброю і «змагацца з пуцінскім крывавым крамлёўскім рэжымам».
Увечары ФСБ паведаміла, што «вылазкі» ўкраінскіх дыверсантаў у Клімаўскім раёне Бранскай вобласці былі спыненыя, «праціўнік выціснуты на тэрыторыю Украіны, дзе па ім нанесены масіраваны артылерыйскі ўдар».
Следчы камітэт Расіі распачаў некалькі крымінальных справаў па фактах здзяйснення тэрарыстычнага акту, замаху на жыццё супрацоўнікаў праваахоўных органаў і знішчэння маёмасці.