Урад Казахстана пайшоў у адстаўку пасля абрання ніжняй палаты парламента. Пра гэта паведамілі 29 сакавіка ў прэс-службе прэзідэнта краіны Касым-Жамарта Такаева.
Як тлумачыў раней прэм’ер Аліхан Смаілаў, кабмін ідзе ў адстаўку ў адпаведнасці з новай канстытуцыяй.
Датэрміновыя выбары ў Мажыліс (ніжняя палата парламента Казахстана) адбыліся 19 сакавіка. У яго склад увайшлі 98 дэпутатаў. Выбары праводзіліся па змяшанай выбарчай сістэме: 70% парламентарыяў (69 чалавек) абралі па партыйных спісах, 30% (29 чалавек) — па аднамандатных акругах. Кіроўная партыя «Аманат» атрымала 53,9% галасоў.
Нагадаем, у пачатку мінулага года ў Казахстане пачаліся хваляванні пасля двухразовага падаражання звадкаванага газу, які многія выкарыстоўваюць у якасці аўтамабільнага паліва. Пратэсты перараслі ў беспарадкі, якія суправаджаліся боесутыкненнямі з сілавікамі, захопам урадавых будынкаў і марадзёрствам. У выніку вулічнага супрацьстаяння загінулі 230 чалавек, з якіх 19 — вайскоўцы і сілавікі. Пасля здушэння хваляванняў у краіне былі запушчаныя палітычныя рэформы.
У верасні 2022 года ў Канстытуцыю Казахстана былі ўнесеныя папраўкі, пасля чаго Такаеў абвясціў пра пазачарговыя прэзідэнцкія выбары. Згодна з новай рэдакцыяй асноўнага закона, тэрмін паўнамоцтваў прэзідэнта павялічаны з пяці да сямі гадоў, а пераабранне забароненае.
На выбарах у лістападзе 2022 года з 82,45% галасоў чакана перамог Такаеў. Пасля пераабрання ён паабяцаў правесці кардынальныя рэформы ў эканоміцы краіны.
