Прэзідэнт Турцыі Рэджэп Таіп Эрдаган, выступаючы перад прыхільнікамі, выказаў меркаванне, што атрымаў перамогу ў першым туры прэзідэнцкіх выбараў, якія прайшлі ў краіне 14 траўня. Яго асноўны супернік Кемаль Кылычдараглу заявіў, што ў Турцыі пройдзе другі тур прэзідэнцкіх выбараў і апазіцыя абавязкова пераможа.
Па стане на раніцу 15 траўня падлічылі 98,51% галасоў. Вынікі пакуль такія:
• Эрдаган: 49,34%;
• Інджэ: 0,43% (выбыў);
• Кылычдараглу: 45%;
• Аган: 5,23%.
Дзеючы прэзідэнт Эрдаган лічыць, што перамог.
«Мы яшчэ не ведаем, ці завяршыліся прэзідэнцкія выбары ў першым туры, праз абмежаванне нашай выбарчай сістэмы 50% плюс адзін голас. <…> Калі наш народ зрабіў выбар на карысць другога туру выбараў, то гэта таксама мае месца. Мы ўпэўненыя, што скончылі гэты тур з колькасцю галасоў больш за 50%», — сказаў Эрдаган.
Ён дадаў, што выбарчай камісіі спатрэбіцца «трохі больш» часу, каб палічыць галасы, і абвінаваціў апазіцыю ў «падмане нацыі» за словы пра лідарства яе кандыдата на выбарах. «У той час як выбары прайшлі ў такой пазітыўнай і дэмакратычнай атмасферы, а падлік галасоў усё яшчэ працягваецца, спробы паспешліва абвясціць вынікі азначаюць узурпацыю народнай волі», — напісаў ён у Twitter.
Кылычдараглу, выступаючы перад прыхільнікамі, заявіў, што ў Турцыі пройдзе другі тур прэзідэнцкіх выбараў і апазіцыя абавязкова пераможа.
«Мы зробім усё, каб цягам наступных 15 дзён разам з нашым народам усталяваць справядлівасць і правасуддзе. Хай наш народ будзе ўпэўнены — мы абавязкова пераможам», — сказаў палітык.
Калі пасля заканчэння падліку бюлетэняў ні ў кога з кандыдатаў у прэзідэнты не будзе больш за 50% галасоў, другі тур выбараў адбудзецца 28 траўня.
Нагадаем, 14 траўня ў Турцыі прайшлі прэзідэнцкія і парламенцкія выбары. Галасаванне скончылася ў 17.00 паводле мясцовага часу, але Эрдаган і Кылычдараглу заклікалі прыхільнікаў не пакідаць выбарчыя ўчасткі, пакуль не будуць абвешчаныя афіцыйныя вынікі.
Акрамя Эрдагана і Кылычдараглу ў першым туры ўдзельнічалі яшчэ два чалавекі — кандыдат ад блока малых партый, былы сябра Рэспубліканскай народнай партыі Мухарэм Інджэ і прадстаўнік ад нацыяналістычнага альянсу (АТА) Сінан Аган. Інджэ зняў сваю кандыдатуру з выбараў за тры дні да іх пачатку, але яго імя засталося ў бюлетэнях.