Вольга Мазуронак стала срэбнай прызёркай традыцыйнага марафону ў Лос-Анджэлесе. Лёгкаатлетка з Беларусі фінішавала другой, прабегшы 42 кіламетры 195 метраў за 2 гадзіны 25 хвілін 48 секунд. Яна саступіла пераможцы 20 секунд.
Адзначым, што Мазуронак выступала ўпершыню пасля Алімпіяды 2021 года ў Токіа, дзе яна заняла пятае месца.
У Лос-Анджэлесе Вольга, якая была чэмпіёнкай Еўропы ў 2018 годзе, выканала алімпійскі нарматыў. У марафоне ён складае для жанчын 2.26.50. Праўда, пакуль невядома, ці зможа бягуха стартаваць на Гульнях у Парыжы. Беларусы не дапушчаныя да спаборніцтваў пад эгідай Міжнароднай федэрацыі лёгкай атлетыкі.
Асабісты рэкорд Мазуронак у бегу на самай доўгай алімпійскай дыстанцыі — 2.23.54. Гэты вынік яна паказала ў Лондане ў 2016 годзе.
У верасні 2023-га Мазуронак пераехала жыць у Лос-Анджэлес. Перад забегам у ЗША Вольга правяла збор у Кеніі.
Пасля выбараў у 2020 годзе яна падпісала ліст свабодных спартоўцаў супраць гвалту.