Падтрымаць каманду Люстэрка
Беларусы на вайне
  1. У беларусов есть собственный русский язык? Вот чем он отличается от «основного» и что об этом говорят ученые
  2. Дэпутаты прынялі падатковае новаўвядзенне. Расказваем, у чым яно заключаецца і каго датычыць
  3. Трамп ввел в США чрезвычайное положение из-за торгового баланса
  4. «Да, глупо получилось». Беларусы продолжают жаловаться в TikTok на трудности с обменом валюты
  5. Похоже, мы узнали реальную численность населения Беларуси. И она отличается от официальной статистики
  6. Аказваецца, у СІЗА на Валадарскага былі віп-камеры. Расказваем, хто ў іх сядзеў і ў якіх умовах
  7. Урад укараняе новаўвядзенні ў рэгуляванне цэн — што змяняецца для вытворцаў і гандлю
  8. Даведаліся з непублічнага дакумента, колькі медыкаў не хапае ў Беларусі (і як чыноўнікі навучыліся хаваць гэтую лічбу)
  9. «Бондарава — тыповы хунвэйбін». Чаму ў Беларусі рэпрэсуюць прарасійскіх актывістаў?
  10. В Кремле усилили риторику о «первопричинах войны»: чего там требуют от Трампа и что это будет означать для Украины — ISW
  11. «Дарога ў адзін канец». Дзейны афіцэр расказаў «Люстэрку», што ў арміі Беларусі думаюць пра вайну з NATO і Украінай
  12. Ці быў у зніклай Анжалікі Мельнікавай доступ да спісаў тых, хто данаціў НАУ, і іншай важнай інфармацыі? Даведаліся ў Паўла Латушкі
Читать по-русски


24-гадовы Дзіма Гопта — адзін з самых вядомых палітвязняў. Хлопец мае асаблівасці развіцця, але, нягледзячы на гэта, яго на два гады кінулі за краты. Дзіму абвінавацілі ва ўдзеле ў пратэстах 8 і 9 жніўня 2020 года ў Жлобіне. Сам хлопец так да канца і не зразумеў, за што яго пасадзілі. Палітвязень адбываў тэрмін у ПК-3 «Віцьба». Адседзеўшы яго цалкам, выйшаў на волю 31 снежня 2022 года. Праз два тыдні разам з матуляй пакінуў Беларусь. Вольга і Дзмітрый Гопты цяпер жывуць у Літве, дзе атрымалі палітычны прытулак. Пра ўсё перажытае яны расказалі «Новаму часу».

Дзіма Гопта разам з мамай Вольгай Гопта. Фота з сямейнага архіва
Дзіма Гопта разам з мамай Вольгай Гопта. Фота з сямейнага архіва

«Сумуем па Беларусі, але цешымся, што ў бяспецы»

Дзіма кажа, што ў Літве яму вельмі падабаецца. Ён вучыць літоўскую мову, кожны панядзелак наведвае заняткі па ёзе, любіць гуляць па Вільнюсе, часта ходзіць у лес, займаецца спортам.

— Нядаўна вось гулялі з сябрам у футбол, дык я так захапіўся, што ўпаў і падрапаў калені, — з усмешкай распавядае хлопец.

У Літве былы палітвязень атрымаў групу інваліднасці. «А ў Беларусі мы гэтага так і не дамагліся», — кажа маці Дзімы Вольга Гопта.

— Працэдура па афармленні інваліднасці тут зусім іншая. Яна не вымагае шпіталізацыі ў псіхіятрычны стацыянар — Дзіма вельмі гэтага баяўся, — усё па-чалавечы, усё зразумела, проста, плюс выдатнае стаўленне з боку медыкаў, — апавядае Вольга Гопта.

Маці хлопца дадае, што рашэнне пра ад’езд з Беларусі далося досыць цяжка:

— Калі Дзімка вызваліўся, я яшчэ нейкі час вагалася: думала, ай, ну, можа, неяк тут зможам жыць. Але даволі хутка я зразумела, што мы не зможам увесь час існаваць у такіх напружанні і няпэўнасці. Я глядзела на Дзіму і разумела, што ён не адчувае сябе ў бяспецы. Параіліся і вырашылі з’язджаць. Мы дужа сумуем па Беларусі, але цешымся, што нарэшце ў бяспецы.

Дзіма кажа, што стараецца забыць перажытае за кратамі, але цяжкія ўспаміны ўсё роўна накочваюць час ад часу, вяртаюцца да хлопца знянацку альбо ў выглядзе начных кашмараў.

— Тады ўвесь сон насмарку. Але гэта не кожную ноч здараецца, — распавядае хлопец. — Калі я згадваю пра турму днём, то я тады выходжу на вуліцу і гуляю, часам іду ў лес.

Мама дадае, што ў сваіх успамінах Дзіма імкнецца знаходзіць штосьці пазітыўнае і радаснае:

— Напрыклад, ён згадвае нейкія цікавыя размовы і сустрэчы з палітвязнямі. Дзімка ўвогуле вельмі пазітыўны, жыццярадасны. Здольнасць і прага бачыць і запамінаць добрае і ўратавалі яго за кратамі.

Дзіма Гопта разам з мамай Вольгай Гопта. Фота з сямейнага архіва
Дзіма Гопта разам з мамай Вольгай Гопта. Фота з сямейнага архіва

«Калі мяне забіралі з суда, я плакаў»

— Вельмі добра памятаю дзень, калі мяне арыштавалі. Я касіў траву каля дома. Да мяне прыйшлі двое мужчын, я спачатку нічога не зразумеў. Мяне павезлі ў РУУС і там я ўжо асэнсаваў, што гэта нейкая падстава, — згадвае акалічнасці арышту Дзіма. — Я сядзеў там усю ноч, і ў мяне пыталіся: што, як і чаму? Мне было вельмі страшна, бо я ведаў, што ў міліцыі моцна б’юць. Але мяне, дзякуй богу, не краналі, толькі задавалі шмат пытанняў.

Самае цяжкае — гэта ўспамінаць пра суд. І сам суд быў для мяне вельмі цяжкім. Калі мяне адтуль забіралі, я плакаў, я не ведаў, што мне рабіць, я думаў, што ўжо больш ніколі не вярнуся з-за кратаў і ўжо ніколі не ўбачу родных і блізкіх.

— Гэта быў шок. Цяпер, калі мы ў бяспецы, шмат якія пачуцці і ўспаміны прытупляюцца, перажытае ўспрымаецца не так балюча… Але на самім пачатку не магла паверыць, што Дзіму ўвогуле могуць пасадзіць, — дадае Вольга Гопта. — На судзе я старалася не плакаць, трымалася, каб яшчэ больш не напалохаць сына. Дома, канешне, ужо дала волю пачуццям. Але прымушала сябе ўзяць сябе ў рукі, бо трэба ж было трымацца, падтрымліваць Дзіму, займацца апеляцыяй. Напачатку была яшчэ нейкая надзея, што прысуд будзе перагледжаны, што адбылася страшэнная памылка, што Дзіму выпусцяць з-за кратаў. Я была ўпэўненая, што сын не будзе сядзець увесь тэрмін, што ён абавязкова выйдзе раней. Але прыкладна праз год стала зразумела, што свой тэрмін Дзіма ўсё ж адседзіць. Не дапамагло нават прашэнне аб памілаванні, якое мы падавалі. Нам адмовілі.

Вольга Гопта дзякуе ўсім за падтрымку і салідарнасць:

— Гэта дужа дапамагала трымацца, не здавацца, давала дадатковыя сілы, каб змагацца за Дзіму.

«Папрасіў маму зрабіць блінчыкі з тварагом»

— Самым цяжкім было прабыць у калоніі, усё гэта вытрымаць. Калі я выйшаў з турмы, то вельмі цешыўся, што я на свабодзе, што мне больш нічога не пагражае, я тады плакаў вельмі моцна, — распавядае былы палітвязень. — Я папрасіў маму зрабіць блінчыкі з тварагом, еў іх і адчуваў сябе самым шчаслівым.

Мне было так добра, калі я нарэшце лёг у свой ложак, так цёпла і ўтульна!

У турме мне вельмі не хапала ежы, увогуле ежа там была вельмі нясмачная.

— А чаго табе больш за ўсё бракавала з ежы? Пра якія стравы ты марыў? Я, напрыклад, марыла аб тым, што калі выйду на волю, то адразу з’ем штук дваццаць глазураваных сыркоў.

— Ух ты, сыркі — гэта клас! Я таксама іх дужа люблю. У турме я хадзіў у атаварку, набываў каўбасу, прысмакі, садавіну, гародніну. Я вельмі люблю мяса і салодкае. Люблю макароны, бульбу. Які беларус яе не любіць. Люблю марозіва, цукеркі. А не хапала таго, што мама гатуе.

Паштоўка, якую Вольга Гопта даслала на дзень нараджэння сына ў калонію. Фота з сямейнага архіва
Паштоўка, якую Вольга Гопта даслала на дзень нараджэння сына ў калонію. Фота з сямейнага архіва
Паштоўка, якую Вольга Гопта даслала на дзень нараджэння сына ў калонію. Фота з сямейнага архіва
Паштоўка, якую Вольга Гопта даслала на дзень нараджэння сына ў калонію. Фота з сямейнага архіва

«Заўсёды баяўся, каб мяне не пачалі біць»

— У турме ў мяне быў вельмі блізкі сябра, палітычны, які заўсёды мне дапамагаў і заўсёды быў побач. Да яго можна было ў любы час звярнуцца.

Я ўвогуле вельмі шмат палітычных за кратамі сустрэў. Напачатку ў калоніі нам дазвалялі размаўляць, а пасля гэтым дзядзькам у пагонах гэта пачало не падабацца.

У калоніі мне было трошкі лягчэй, чым у СІЗА.

Я не магу сказаць, што ў турме мяне занадта крыўдзілі. Хлопцы і ў СІЗА, і ў калоніі ставіліся да мяне добра. Ніхто не штурхаў, не крычаў. А супрацоўнікі — так, грубілі, лаяліся. І я заўсёды баяўся, каб мяне не пачалі біць.

На прагулку ў гомельскім СІЗА мяне выводзілі ў кайданках. Аднойчы жанчына ў пагонах надзела на мяне кайданкі і сказала, што я тэрарыст.

Калі мяне этапавалі, то таксама надзелі кайданкі. Мне было вельмі страшна. Было страшна прасіцца ў туалет, бо гэтыя людзі былі з сабакамі, а за спінай ва ўсіх былі дубінкі. Я не ведаў, куды мяне вязуць, што са мной будзе і ўвогуле што прынясе наступны дзень.

— Дзіма, ведаю, што табе шмат пісалі, у тым ліку і мае сябры. Ці атрымліваў ты лісты ад незнаёмых людзей?

— Мне вельмі шмат лістоў прыходзіла, я заўсёды дужа радаваўся! Але так было не заўсёды. Пазней мне пачалі аддаваць зусім мала лістоў.

— А ці была ў цябе магчымасць сустрэцца з мамай? Ці не забаранялі табе атрымліваць пасылкі?

— З мамай у мяне былі толькі кароткія спатканні.

Доўгатэрміновыя мне не давалі. Пасылкі ўвесь час атрымліваў, мама сама ўсё прывозіла ў калонію. Усё такое смачнае і свежае!

— Калі я прыязджала да Дзімы ў калонію, то заўсёды старалася і выглядаць добра і трымацца. Разумела, што, калі раскісну і ён гэта заўважыць, яму маральна будзе вельмі цяжка, — дадае спадарыня Вольга. — І калі ён тэлефанаваў, я заўсёды трымалася бадзёра, увесь час казала, як мы яго любім і чакаем.

Дзмітрый Гопта з валанцёркай за мяжой. Красавік 2023 года. Фота: Facebook Іллі Міронава
Дзмітрый Гопта з валанцёркай за мяжой. Красавік 2023 года. Фота: Facebook Іллі Міронава

Пра веру, малітвы і планы

— Дзіма, а ці змушалі цябе ў калоніі працаваць?

— Так, я працаваў. На швейцы. Абразаў там ніткі. Калі б я адмовіўся, то мне б далі «суткі».

— А што ты рабіў у вольны час?

— Хадзіў у бібліятэку, можна было і на стадыён схадзіць. Там турнікі і брусы былі.

У калоніі была царква, я хадзіў і туды. Я веру ў Бога.

— А пра што ты просіш Бога, калі молішся?

— Я прашу, каб з маімі бацькамі ўсё было добра, каб яны не хварэлі.

— Як у цябе там было са здароўем? Ці хварэў ты? Ці прымаў цябе ўрач, калі ты адчуваў, што табе нядобра?

— Са здароўем у мяне там было не вельмі. Я згубіў шмат вагі. У мяне моцна балелі зубы. Напярэдадні вызвалення я лячыў іх у калоніі. І пасля вызвалення, у Літве: два зубы мне ўвогуле выдалілі, а шэсць залячылі.

Яшчэ памятаю, што я ўвесь час замярзаў там. Неяк папрасіў матулю перадаць мне цёплы швэдар, дык мне не дазволілі яго мець.

— А як ты цяпер сябе адчуваеш?

— Лепей за ўсіх. Толькі што руку вось зламаў нядаўна: паслізнуўся, калі бег за аўтобусам. Мне нават гіпс накладалі. Але цяпер усё добра.

— Дык Дзіма нават не данасіў яго да канца. Прыходжу неяк з працы, а ён кажа: «Мама, толькі не сварыся, але я зняў гіпс, бо мне было горача», — з усмешкай дадае матуля былога палітвязня.

Напрыканцы размовы Дзіма прызнаецца, што вельмі хоча наведаць і іншыя краіны, павандраваць.

— А куды паедзеш найперш?

— У Швейцарыю, — без ваганняў кажа Дзіма. — А яшчэ я хачу завесці сабаку. Пакуль што не ведаю, праўда, вялікага ці малога. Ну, і, канешне, трэба маму запытацца наконт гэтага.

Дзмітрый Гопта быў затрыманы 5 лютага 2021 года, яму тады быў 21 год. Яго абвінавацілі ва ўдзеле ў пратэстах у Жлобіне 9−10 жніўня 2020-га па арт. 342 КК аб удзеле ў групавых дзеяннях, якія груба парушаюць грамадскі парадак, і арт. 364 КК аб гвалце ў дачыненні да міліцыянта.

На судзе хлопец, як параіў дзяржаўны адвакат, цалкам прызнаў сваю віну — сказаў, што кінуў адзін камень у бок міліцыі і ўцёк. Нягледзячы на ​​разумовую адсталасць, суддзя Ірына Прадун прыгаварыла яго да пазбаўлення волі на два гады, бо эксперты далі заключэнне, што хлопец, хаця і мае праблемы з паводзінамі, здольны ўсведамляць свае дзеянні.

Увесь тэрмін зняволення Дзмітрыя яго маці Вольга Гопта змагалася за вызваленне сына, з яе дапамогай ён падаваў прашэнне аб памілаванні. Але ў пачатку 2022 года жанчына паведаміла, што ў памілаванні было адмоўлена. Таксама хлопец не патрапіў і пад амністыю летась, нягледзячы на ​​тое, што яго ўключаў у свае спісы Юры Васкрасенскі, які, як ён сам запэўніваў, па даручэнні Лукашэнкі рыхтаваў спісы на амністыю. У кастрычніку 2022 года МУС уключыла Гопту ў пералік «асоб, якія маюць дачыненне да экстрэмісцкай дзейнасці».

Хлопец адбываў пакаранне ў папраўчай калоніі № 3 «Віцьба» пад Віцебскам. Па словах яго маці, нават да канца тэрміна ён так і не разумеў, за што сядзіць. Ён вызваліўся 31 снежня 2022 года і разам з маці з’ехаў з краіны.