У Беларусі вызначылі памежныя максімальныя тарыфы на ўсе віды стаматалагічных паслуг. Гэта вынікае з пастановы Мінздароўя, апублікаванай 22 лістапада на Нацыянальным прававым інтэрнэт-партале.
Дакумент уводзіць памежныя тарыфы на ўсе віды стаматалагічных паслуг і маніпуляцый. Вось некаторыя з іх:
- агляд пацыента падчас першаснага звароту — 5,66 рубля;
- агляд пацыента падчас паўторнага звароту — 2,96 рубля;
- кансультацыя доктара-стаматолага — 8,37 рубля;
- выдаленне зубных адкладаў — ад 1,71 рубля ручным і хімічным метадам да 2,44 рубля — апаратным (за адзін зуб);
- накладанне часовай пломбы — 1,35 рубля;
- інфільтрацыйная анестэзія (з разліку аднаразовага ўжывання) — 2,96 рубля;
- пакрыццё аднаго зуба фтораўтрымальным або герметызавальным прэпаратам — 1,20 рубля;
- часовае шынаванне зубоў фотапалімерным кампазіцыйным матэрыялам (у разліку на адзін зуб) без кошту матэрыялаў — 2,96 рубля;
- выраб адной часовай каронкі — 11,21 рубля;
- выраб аднаго часовага зуба — 14,05 рубля;
- выраб штучнага пластмасавага зуба — 7,16 рубля;
- выраб металакерамічнай каронкі — 42,44 рубля;
- выраб каронкі з абліцоўваннем з кампазіцыйных (кампазітных) матэрыялаў — 41,36 рубля.
Ва ўсіх гэтых выпадках максімальныя тарыфы не змяніліся ў параўнанні з папярэднім рэгуляваннем у траўні.
Поўны пералік паслуг і маніпуляцый з цэнамі можна даведацца тут.
Нагадаем, напярэдадні ў Мінздароўя заявілі пра «кардынальнае рашэнне па зніжэнні неабгрунтавана высокіх тарыфаў на стаматалагічныя паслугі». Новая пастанова зацвярджае памежныя максімальныя тарыфы на гэтыя віды паслуг, і арганізацыі аховы здароўя не могуць уводзіць вышэйшыя — незалежна ад віду уласнасці.
У ведамстве таксама ўдакладнілі, што на зубатэхнічныя і артапедычныя тэрапеўтычныя, хірургічныя і артадантычныя паслугі мусяць быць уведзеныя разліковыя тарыфы зыходзячы з сярэдняй зарплаты медработнікаў, накладных і іншых выдаткаў.
«Улічваючы, што ў дзяржаўных установах аховы здароўя традыцыйна тарыфы сфармаваныя на ніжэйшым узроўні, аналіз, праведзены экспертамі, паказвае, што адбудзецца і зніжэнне дзейных тарыфаў па недзяржаўных клініках», — прагназуе Мінздароўя.
Там чакаюць, што цяпер выдаленне малочнага зуба ў сярэднім патаннее на 33% (са 127 да 85,6 рубля), складанае выдаленне — на 42% (з 479 да 278 рублёў), лячэнне сярэдняга карыесу — на 47% (са 163 да 86,4 рубля).
У Мінздароўя лічаць, што ўвядзенне такога рэгулявання патрэбнае для павышэння даступнасці платных стаматалагічных паслуг для насельніцтва.
Чытайце таксама
