У Польшчы звярнулі ўвагу на змяненне рыторыкі Аляксандра Лукашэнкі, аднак застаецца адкрытым пытанне, колькі свабоды яму дае Расія. Пра гэта ў эфіры Radio Zet заявіў міністр унутраных справаў і адміністрацыі, каардынатар спецыяльных службаў Томаш Семоняк, каментуючы магчымыя варыянты развіцця сітуацыі на мяжы. Увагу на эфір звярнуў Reform.news.
Міністр падкрэсліў, што Польшча працягвае настойваць на вызваленні Андрэя Пачобута, супрацоўніцтве беларускага боку ў вышуку забойцы польскага салдата. Пакуль гэтыя і іншыя пытанні не вырашаныя, варыянт далейшага закрыцця памежных пераходаў працягвае разглядацца. Разам з тым ён канстатаваў змяненне рыторыкі беларускіх уладаў.
— Маем дачыненне з такой сітуацыяй, што з ліпеня ў Лукашэнкі новая рыторыка адносна Польшчы, ёсць зніжэнне колькасці спробаў парушэнняў. Мы лічым, што ёсьць магчымасці гэтыя цяжкія праблемы вырашыць. Зразумела, што гэтыя перамовы мусяць праводзіцца ў атмасферы даверу, каб быць паспяховымі. У гэтым кірунку будзем рухацца. Заўсёды будзем кіравацца інтарэсамі Польшчы, а інтарэсы Польшчы — гэта вызвалены Андрэй Пачобут, і забойца польскага салдата, які будзе асуджаны і паўстане перад судом, і мноства справаў, якія, мы перакананыя, можна інакш урэгуляваць, калі ідзе гаворка пра польска-беларускія адносіны. Відавочна, ёсць пытанне, колькі свабоды мае Беларусь перад Расіяй ва ўсім гэтым. Бо гэта працэс, які ўсе мы назіраем, — пракаментаваў Семоняк.