Пасольства Беларусі ў Турцыі не можа знайсці чатырох беларусаў — адну жанчыну і трох дзяцей. Пра гэта паведаміў першы сакратар дыпмісіі Сяргей Шынкевіч, піша Sputnik.
Паводле яго словаў, 6 лютага супрацоўнікі пасольства абзвоньвалі ўсіх беларусаў, якія жывуць у Турцыі і стаяць на консульскім уліку. Гэта больш за 400 грамадзян, 53 з якіх пражываюць у тых раёнах, дзе адбыўся землятрус ― на паўднёвым усходзе краіны.
«Абзвоньвалі, каб атрымаць інфармацыю пра іх месцазнаходжанне, стан здароўя і магчымыя наступствы ад землятрусаў. Па выніках гэтай працы сапраўды два паўналетнія і тры непаўналетнія грамадзяніны Беларусі не выйшлі на сувязь», — адзначыў суразмоўца.
З адной беларускай удалося звязацца раніцай 8 лютага — гаворка пра Аляксандру Акпінар, 7 лютага «Люстэрка» паведаміла, што яна ў бальніцы. Яе муж, які пацярпеў у выніку землятрусу, памёр у бальніцы, дзіця па-ранейшаму шукаюць.
Акрамя Алі Кемаля Акпінара не ўдаецца высветліць месцазнаходжанне яшчэ адной поўнагадовай грамадзянкі Беларусі і двух дзяцей, якія жывуць у горадзе Кахраманмараш.
Нагадаем, землятрус магнітудай 7,7 з эпіцэнтрам на глыбіні 7 км адбыўся ў 4.17 раніцы 6 лютага ў правінцыі Кахраманмараш на поўдні Турцыі. Наступствы закранулі мноства рэгіёнаў Турцыі і суседняй Сірыі. Штуршкі доўжыліся ўвесь дзень. Паводле апошніх звестак, загінула амаль 8 тысяч чалавек.