Масіраваная атака дронаў на Маскву і Падмаскоўе — гэта сігнал Уладзіміру Пуціну перад пачаткам перамоваў. Пра гэта заявіў кіраўнік Цэнтра процідзеяння дэзінфармацыі пры Радзе нацыянальнай бяспекі і абароны (РНБА) Украіны Андрэй Каваленка.
— Дронавы налёт на Маскву і Маскоўскую вобласць — гэта дадатковы сігнал Пуціну, што ён таксама мусіць быць зацікаўлены ў прыпыненні агню з паветра, — сказаў Каваленка, адзначыўшы, што мэтай было паказаць, што могуць быць атакаваныя не толькі НПЗ, «дроны могуць масава ляцець і на Маскву».
Хоць большасць гэтых дронаў збівае СПА, бо вакол Масквы выбудаваная эшаланаваная абарона, гэта не ратуе расіян ад панікі, адзначыў прадстаўнік РНБА.
Каваленка таксама заявіў, што цяперашняя атака стала самай буйной з пачатку вайны.
У выніку атакі загінулі два чалавекі і яшчэ 18 пацярпелі. Праз атаку беспілотнікаў былі ўведзеныя часовыя абмежаванні на працу маскоўскіх аэрапортаў Дамадзедава, Шарамеццева і Унукава. Праз пашкоджанне чыгуначных шляхоў былі адмененыя некаторыя цягнікі.
Атака адбылася перад сустрэчай украінскай і амерыканскай дэлегацый у Саудаўскай Аравіі. Як пісала агенцтва Reuters са спасылкай на двух амерыканскіх чыноўнікаў, ЗША падчас перамоваў з украінскай дэлегацыяй у Саудаўскай Аравіі плануюць высветліць, ці гатовы Кіеў пайсці на саступкі Расіі для спынення вайны. Дзяржсакратар ЗША Марка Рубіа адзначыў, што сустрэча ў Саудаўскай Аравіі «будзе мець ключавое значэнне» для аднаўлення амерыканскай ваеннай дапамогі Кіеву.
